आजच्या लोकसत्तात (दि. १९ मार्च २०१०) एक बातमी वाचली. ती बातमी अशी:

भारत ज्योतिषशास्त्राचे माहेरघर -मोहन भागवत

नागपूर, १९ मार्च/प्रतिनिधी
एकेकाळी भारतामध्ये ज्योतिषशास्त्र फार शिखरावर होते. अन्य देशातील विद्वान व ज्योतिषशास्त्रप्रेमी भारतात येऊन हे शास्त्र भारतीय विद्वानांजवळ शिकत असत व त्यानंतर भारतीय ग्रंथांची भाषांतरे आपापल्या देशातील भाषांमध्ये करत असत. आपला देश ज्योतिषशास्त्राबरोबर इतर विद्यांचे पण माहेरघर आहे, असे प्रतिपादन राष्ट्रीय स्वयंसेवक संघाचे सरसंघचालक डॉ. मोहन भागवत यांनी केले. ते नागपुरातील आंतरराष्ट्रीय संस्थेचे ज्योतिषाचार्य डॉ. अनिल वैद्य यांनी जागतिक स्तरावर यश संपादन केल्याबद्दल त्यांचे अभिनंदन करण्यासाठी संघ मुख्यालयात आयोजित करण्यात आलेल्या एका छोटेखानी समारंभात बोलत होते. ज्योतिषशास्त्राला न्युनगंडामुळे दुय्यम परिस्थिती प्राप्त झाली आहे. पूर्वीच्या ज्योतिष ग्रंथकारांनी लावलेली व सांगितलेली ब्रम्हांडातील अपूर्व रहस्ये, शोध त्यांच्या ग्रंथामध्येच राहिले आहेत. यासाठी आता भारतातील ज्योतिषांनी अभ्यास करून, परिश्रम करून परत या क्षेत्रात देशाचे नाव उज्वल करावे, असे आवाहन मोहन भागवत यांनी केले.अमेरिकन सोसायटी ऑफ अ‍ॅस्ट्रोलॉजर्स या संस्थेतर्फे जगातील ज्योतिष अभ्यासकांकडून ज्योतिषशास्त्रानुसार ‘२०१० मधील अमेरिका’ या विषयावर लेख मागवण्यात आले होते. या आवाहनानुसार, सुमारे २३ लेख प्राप्त झाले. नुकतेच वॉशिंग्टन येथे झालेल्या या संस्थेच्या वार्षिक सभेत ज्योतिषाचार्य डॉ. अनिल वैद्य यांच्या मेदिनीय ज्योतिषानुसार, २०१० मधील अमेरिका या नाविन्यपूर्ण व अत्यंत अभ्यासपूर्ण लेखास उत्कृष्ट लेख म्हणून निवडण्यात आले. डॉ. वैद्य यांनी या लेखात प्रामुख्याने बदलत्या ग्रहस्थितीमुळे निर्माण होणाऱ्या नैसर्गिक आपत्ती, प्रजापती, हर्षल ग्रहामुळे ओबामा शासनातर्फे घेण्यात येणारे चुकीचे निर्णय, आंतरराष्ट्रीय धोरणे, देशाची सांपत्तीक आणि राजकीय परिस्थिती वगैरेवर भाकिते वर्तवण्यात आली आहेत. यावेळी विविध क्षेत्रातील नामवंत उपस्थित होते.

आदरणीय सरसंघचालकांनी काही विधाने केली आहेत. त्यापैकी ३ विधाने मला विचारप्रवृत्त करणारी वाटली. ह्या विधांनावर उपक्रमींचे मत जाणून घ्यायला आवडेल. ती विधाने अशी:
१. भारत ज्योतिषशास्त्राचे माहेरघर
भारत खरेच ज्योतिषशास्त्राचे माहेरघर होते/आहे का? (होराभूषण मधला होरा हा ग्रीक आहे, असे मी बहुधा उपक्रमावरच वाचले होते.)

२. ज्योतिषशास्त्राला न्युनगंडामुळे दुय्यम परिस्थिती प्राप्त झाली आहे.
ज्योतिषशास्त्राला खरेच दुय्यम परिस्थिती प्राप्त झाली आहे का? असल्यास पहिल्या दर्जाची परिस्थिती कशी असावी?

३. पूर्वीच्या ज्योतिष ग्रंथकारांनी लावलेली व सांगितलेली ब्रम्हांडातील अपूर्व रहस्ये, शोध त्यांच्या ग्रंथामध्येच राहिले आहेत.
हे कसे काय कळले. अशा काही शोधांबद्दल, अपूर्व रहस्यांबद्दल कुणाला विशेष माहिती असल्यास कृपया द्यावी.

ह्याशिवाय,

बदलत्या ग्रहस्थितीमुळे निर्माण होणाऱ्या नैसर्गिक आपत्ती, प्रजापती, हर्षल ग्रहामुळे ओबामा शासनातर्फे घेण्यात येणारे चुकीचे निर्णय, आंतरराष्ट्रीय धोरणे, देशाची सांपत्तीक आणि राजकीय परिस्थिती वगैरेवर भाकिते वर्तवण्यात आली आहेत.
प्रत्येक मंत्रालयात एक वास्तुशास्त्री, एक होराभूषण, एक नाडीतज्ज्ञ नेमायला हवा असे दिसते. हे सगळे वाचल्यावर भाजपाच्या व संघाच्या भवितव्याबाबत, भविष्याबद्दल तुम्हाला एखादे भाकीत वर्तवावेसे वाटते आहे काय? वाटत असल्यास कृपया ते वर्तवावे, ही विनंती.