प्रतिभाताईंचे अभिनंदन

योगेश

June 14, 2007 - 2:55 pm

आपल्या (अर्थातच) आदरणीय वगैरे व सर्वांच्या लाडक्या सोनियाजींनी प्रतिभा पाटील यांचे नाव राष्ट्रपतीपदासाठी सुचवले आहे. भारताच्या सर्वोच्च नेतेपदी एका महिलेने विराजमान व्हावे आणि ती संधी एका मराठी माणसाला मिळावी ही आनंदाचीच गोष्ट आहे.

पण त्यांना "राष्ट्रपती" म्हणणे कसेसेच वाटते.

आणि राष्ट्रपत्नी हा तर भयंकर शब्द आहे.

तेव्हा प्रतिभाताई या पदावर विराजमान झाल्यावर त्यांना आपण राष्ट्राध्यक्ष ह्या Neutral Gender नामाने संबोधूयात :)

थॅंक्यू सोनियाजी. अभिनंदन प्रतिभाताई

लेखनविषय:

दुवे:

Comments

सोनियाजींचे कौतुक

योगेश [15 Jun 2007 रोजी 04:03 वा.]

वाटल्याशिवाय राहत नाही. सुशीलकुमारांऐवजी प्रतिभाताईंचे नाव सुचवल्यामुळे मायावतींच्या दलित वोट ब्यांकेला धक्का लागलेला नाही त्यामुळे त्यांना काही ऑब्जेक्षण असेल असे वाटत नाही.

पण इतर उपक्रमींना एक मराठी महिला सर्वोच्चस्थानी जाणार आहे याचा आनंद व्यक्त करावा वाटत नाही का? की आनंद झालाच नाही?

येथे लिहिण्यासाठी मी गमभन वापरतो.

पहिला?

चित्रा [15 Jun 2007 रोजी 12:46 वा.]

पोलिटिकली ब्रिलियण्ट मूव्ह !
सहमत! प्रतिभाताईंचे अभिनंदन. सोनिया गांधींची हुषार चाल हे खरेच. पण त्यापलिकडे पहिली स्त्री राष्ट्राध्यक्ष व्हायला भारतासारख्या देशात काही मोठी आडकाठी किंवा प्रश्न उपस्थित होत नाही हे पाहून समाधान वाटले.

सोनियाजींनी आयुष्यात घेतलेला दुसरा चांगला निर्णय आहे हा.

पहिला कुठचा?

अवांतरः अजूनही काँग्रेसच्या अशा सर्व खेळी फक्त सोनिया गांधी खेळू शकतात याचे आश्चर्य वाटते. पंतप्रधान मनमोहन सिंगांनी याबाबतीत लक्ष घालू नये याचेही आश्चर्य वाटते..

पहिला निर्णय कुणाचा?

विकास [15 Jun 2007 रोजी 18:24 वा.]

पहिला निर्णय स्वतः पंतप्रधान न होता मनमोहन सिंग ह्यांना पुढे करण्याचा.

सोनीयाजींना जर पंतप्रधान होयचेच नव्हते तर सुरवातीस जेंव्हा काँग्रेसच्या निर्वाचीत सदस्यांनी त्यांना पंतप्रधान पदाचे उमेदवार म्हणून राष्ट्रपतींकडे नामांकीत (नॉमिनेट) केले तेंव्हा मग सोनीयाजींनी स्वयंनामांकीत (सेल्फ नॉमिनेटेड) म्हणून सही कशी केली?
राष्ट्रपतींकडे त्या जेंव्हा शपथविधीच्या आदल्या संध्याकाळी गेल्या तेंव्हा असे नक्की काय झाले म्हणून त्या बाहेर येऊन डोळ्यात आसवे आणून म्हणाल्या की मी नाही होणार म्हणून? (त्या दिवशी दिल्लीत परदेशी पाहुणे किती आले होते हा संशोधनाचा विषय होऊ शकेल...)
नंतर युपिएचे सरकार आल्यानंतर जेंव्हा नागरीकत्वाचा कायदादरूस्त करण्यात आला ज्याचा फायदा तुम्हा-आम्हासकट विशिष्ठ देशातील भारतीय वंशाच्या लोकांना मिळाला, त्यात "रेसिप्रोसिटी" चे कलम गाळून टाकण्यात आल्याचे समजते, ते का? (रेसिप्रोसिटी - जे देश आमच्या नागरीकांना जे हक्क देतात तेच त्यां देशातील नागरिकांना मिळतील. या तरतुदीमुळे त्या पंतप्रधान आधी होण्याची शक्यता नव्हती). तुम्हाला माहीती आहे की, खर्‍या अर्थाने विद्वान आणि राजकाराणनिपूण असलेल्या माजी पंतप्रधान नरसिंहराव त्यांना पंतप्रधान असताना नागरीक कायदा बदलण्यावरून प्रश्न विचारला असता ते म्हणाले होते की "हे जर इतके सोपे असते तर ते कधीच झाले असते!'

आज प्रतिभा पाटील यांना नामांकीत केल्याचा आनंद नक्कीच आहे पण आशा करतो की त्या पक्षातीत राहतील आणि मुख्य म्हणजे व्यक्तीनिष्ठ न राहता राष्ट्रनिष्ठ राहतील...कारण हे पहा:

प्रदेश काँग्रेसचे अध्यक्षपद घेण्यासाठी त्यांना राज्यसभेच्या उपाध्यक्षपदाची मानाची जागा सोडावी लागली, पण गांधी कुटुंबाला निष्ठा वाहूनच राजकारण करण्याचे त्यांनी ठरवले, त्याचे फळही त्यांना मिळाले. संदर्भ: http://maharashtratimes.indiatimes.com/articleshow/2124243.cms

त्याग?

चित्रा [16 Jun 2007 रोजी 20:38 वा.]

आपल्या निपक्षपाती भूमिकेबद्दल प्रसिद्ध वृत्तपत्रांनी सोनियाजींच्या त्यागाची तुलना म. गांधींशी केली होते, हे आठवते.

त्याग वाटला नाही, तेव्हाही आणि आत्ताही. शिवाय ही तुलना मला वाटते मराठी वृत्तपत्रांपैकी लोकसत्ताच्या कुमार केतकर यांनी केली होती असे आठवते. कुमार केतकरांचे सोनिया प्रेम हे तसे बरेच प्रसिद्ध आहे आणि ते स्वतः निपक्षपाती असल्याचे काही पुरावे नाहीत..

परंतु जशी "हा निर्णय सी आय ए चा" ही शंका घेण्यास जागा आहे, तशीच "हा निर्णय सोनियाजींचा" अशीही.
सी आय ए म्हणजे कसे काय? हे मी पहिल्यानेच ऐकते आहे. सोनियाजींचाच निर्णय आहे, पण तो त्यागातून आला आहे असे सबळ पुरावे दिसले नाहीत.

अब्दुल कलाम

प्रकाश घाटपांडे [15 Jun 2007 रोजी 04:34 वा.]

अब्दुल कलाम हे नात्याने महात्मा गांधींचे जावई आहेत. पण मुदत संपल्यावर काय करणार?
???!!!!
प्रकाश घाटपांडे

पहिल्या महिला राष्ट्राध्यक्ष

वासुदेव [15 Jun 2007 रोजी 05:32 वा.]

प्रतिभाताईंचे मनःपूर्वक अभिनंदन आणि त्यांची कारकीर्द संस्मरणीय ठरो ही शुभेच्छा! राष्ट्राध्यक्ष आणि पंतप्रधानांच्या बाबतीत गेल्या काही वर्षात भारत नशीबवान ठरला आहे. भारताचा भविष्यकाळही असाच उज्ज्वल राहो.
आपला
(शुभेच्छुक) वासुदेव

~ नासतो विद्यते भावो नाभावो विद्यते सत: । ~

अभिनंदन!/निरोप

शशांक [15 Jun 2007 रोजी 06:35 वा.]

प्रतिभाताईंचे अभिनंदन! समाजकार्य आणि राजकारण यांच्या प्रदीर्घ अनुभवाच्या जोरावर त्यांची कारकीर्द यशस्वी व्हावी असे वाटते. (प्रतिभाताईंची आजवरची कारकीर्द) येत्या निवडणूकीनंतर त्यांना महत्त्वाची भूमिका बजावावी लागणार आहे असे दिसते.
नव्या राष्ट्राध्यक्षांच्या आगमनाबरोबरच अब्दुल कलामांना निरोप देण्याची वेळ आली आहे. त्यांच्यासारखे प्रेरणादायी व्यक्तिमत्त्व आपल्याला राष्ट्राध्यक्ष म्हणून लाभले हे आपले भाग्यच.

मराठीच?

तो . [15 Jun 2007 रोजी 10:30 वा.]

प्रतिभा पाटील यांचे यजमान (देविसंग) काही पिढ्यांपूर्वी (?) राजस्थानात स्थायिक झालेले मूळचे मराठी आहेत असे समजते.

~~ 'तो ' सध्या 'हे' वाचत आहे! ~~

पण?

प्रियाली [15 Jun 2007 रोजी 10:46 वा.]

ह्या मराठी राष्ट्राध्यक्षांचा नवरा मुळात अमराठी आहे, शेखावत नावाचा, हे पाहून तर खूपच छान वाटले.

का बरं? म्हणजे नवरा मराठी/ अमराठी असल्याने काय फरक पडला ते कळलं नाही. :( (आणि फरक पडत असेल तर सोनियाचा नवरा विदेशी [की स्वदेशी?] आहे[होता], मग त्यांचे पारडे जड असावे.)

मराठी कुणाला म्हणावे

जयेश [15 Jun 2007 रोजी 07:50 वा.]

सर्वप्रथम प्रतिभाताईंचे हार्दिक अभिनंदन मराठी म्हणून नव्हे तर आता पर्यंतच्या इतिहासात प्रथमच एक महिला राष्ट्रप्रमुखपदी विराजमान होणार म्हणून !
आपण मराठी माणसे तशी खुपच भावनाप्रधान. आपल्या समाजातील कुणाला जर सन्मान प्राप्त होत असेल तर अभिमान वाटणे स्वाभाविक आहे. परंतु "मराठी माणूस" कुणाला म्हणावे याचा विचार करण्याची वेळ आली आहे असे मला वाटते. सार्वजनिक क्षेत्रात अनेक मराठी व्यक्ति त्यांच्या कर्तृत्वाने सन्मान मिळवतात, परंतु मराठी म्हणून त्यांचे कौतुक करणे कितपत संयुक्तिक आहे.
उदा. रजनीकांत दक्षिणेचा सूपरस्टार आहे आणि तो मराठी आहे म्हणून त्याचे कौतुक करावे का? मागे एका मुलाखती मध्ये त्याने आता आपल्याला मराठी बोलणे जमत नसल्याचे मान्य केले. शेजारील राज्यांसोबत पाणी तंट्यामध्ये त्याने महाराष्ट्राची न्याय्य बाजूही घेतल्याचे ऎकीवात नाही.
त्याचं जाऊ द्या हो. बंगलोर मध्ये जेंव्हा भरदिवसा बेळगावच्या मराठी महापौरांना कानडी गुंडांनी काळे फासले तेंव्हा किती महनीय मराठी माणसांनी त्याचा निषेध केला.
मला वाटतं मराठी म्हणून कौतुक करताना संबंधित व्यक्तिने तिच्या पदाचा, सत्तेचा किंवा कौशल्याचा महाराष्ट्राच्या, मराठीच्या आणि अन्य मराठी माणसांच्या विकासात किती योगदान दिले याचा विचार व्हावा.
अनेक अशा अमराठी व्यक्ति आहेत ज्यांचा महाराष्ट्राच्या व मराठीच्या विकासात मोलाचा वाटा आहे.

- जयेश्

मराठी झेंडा

एकलव्य [16 Jun 2007 रोजी 02:54 वा.]

मराठी महिला राष्ट्राध्यक्ष झाल्यास मला आनंद होईल. काँग्रेसच्या काही राष्ट्रपतींचा (उदा. झैलसिंग) केवळ हाय कमांडची हांजी हांजी करणे हाच एकमेव बाणा असल्याने पुढे जाऊन काय होईल याची काळजी वाटते.

सोनिया गांधी यांनी प्रतिभा पाटील यांची घोषणा काहीशी नाईलाजाने केलेली दिसते आहे. तरीही चाणाक्ष चाल आहे हे नक्कीच. कोठूनही फेकले तरी पायावर पडायची कला मांजरांनी राजकारण्यांकडून शिकली आहे असे म्हणतात.

(मराठी) एकलव्य

मला वाटतं मराठी म्हणून कौतुक करताना संबंधित व्यक्तिने तिच्या पदाचा, सत्तेचा किंवा कौशल्याचा महाराष्ट्राच्या, मराठीच्या आणि अन्य मराठी माणसांच्या विकासात किती योगदान दिले याचा विचार व्हावा.

जयेश यांच्या या विचाराचे मी समर्थन करतो.

वहाणा...

विकास [16 Jun 2007 रोजी 16:01 वा.]

आणिबाणीच्या काळातील वाचलेला किस्सा...

संजय गांधी विमानात जीन्यावरून चढत असताना त्याची चप्पल खाली जमिनीवर पडली ताबडतोब निरोप द्यायला आलेल्या झैलसिंग आणि शंकरराव चव्हाण पळत जाऊन "पादुका" हातात घेऊन माननीय "संजयरावजी गांधीजी महाराजांच्या" पायात घालायला पळाले...

पोस्टल बिलाच्या वेळेस झैलसिंग नक्कीच बदलले होते पण ते "सौ चुहे मारकर.." पद्धतीने जेंव्हा त्यांची खूपच थट्टा काँग्रेसजन करायला लागले तेंव्हा...

फक्रुद्दीन अली अहमद (बाकी कसे होते माहीत नाही पण) यांना जर आणिबाणी जाहीर करण्याच्या सही मुळे म्हणत असाल तर त्या नंतर त्यांचे लगेचच ह्रदयविकाराच्या तिव्र झटक्याने निधन झाले आणि नंतरच्या काळात बी.डी. जत्ती हे हंगामी राष्ट्रपती म्हणून जनता सरकार येई पर्यंत राहीले. फक्रुद्दीन अली अहमद यांच्या निधनाबद्दल पण उलटसुलट वाचले होते, पण त्यातील सत्यासत्यता अजिबातच माहीत नसल्यामु़ळे ते येथे लिहीत नाही.

यो यो

अभिजित [15 Jun 2007 रोजी 08:08 वा.]

लय भारी....

राष्ट्राध्यक्ष प्रतिभा पाटील ... वाह एकदम सॉलिड.

प्रतिभाताईंचे अभिनंदन ... (पण ...)

विसुनाना [15 Jun 2007 रोजी 08:26 वा.]

प्रतिभाताई पाटील यांना राष्ट्राध्यक्षा पदाची अधिकृत उमेदवारी मिळाली हे चांगले झाले.
पण माझ्या मताप्रमाणे खुद्द श्रीमती सोनिया गांधी स्वतःच का ...?
१. त्या महिला आहेत.
२. काँग्रेस या भारताला स्वातंत्र्य मिळवून देणार्‍या एकमेवाद्वितीय अखिल भारतीय पक्षात त्यांनी अनेक वर्षे मोलाचे काम केले आहे.
३. त्यांना भारताच्या मंत्रीमंडळात कोणतेही स्थान नको आहे.
४. त्यांना भाजपा- राष्ट्रवादी सकट सार्‍या पक्षांचा एकमुखी पाठिंबा मिळाला असता.
५. या देशाची परराष्ट्र-सहिष्णुता जगासमोर आणखी ठळक झाली असती.
६. राष्ट्रपती केवळ रबर स्टँप असतो असे म्हणणे चूक ठरले असते.
७. भारतातील सामन्य जनतेला राष्ट्रपिता महात्मा गांधींची नातसून ;) राष्ट्राध्यक्षा झाली याचे समाधान मिळाले असते.

माझा अपेक्षाभंग झाला. असो.

हम्म्

प्रकाश घाटपांडे [15 Jun 2007 रोजी 10:19 वा.]

भारतातील सामन्य जनतेला राष्ट्रपिता महात्मा गांधींची नातसून ;) राष्ट्राध्यक्षा झाली याचे समाधान मिळाले असते.

कसे काय बुवा?

प्रकाश घाटपांडे

तुमाला म्हायीत न्हाई?

विसुनाना [15 Jun 2007 रोजी 10:47 वा.]

आवो, आसं काय करतायसा? ती इंदरामाय - जवारलाल नेरुंची मुल्गी आन गांधी बाबांची सून व्हती न्हवं (पाप बिचारी, कशी रानीवानी व्हती... ग्येली बिचारी ...) - तिचा त्यो राजीव गांधी प्वोरगा (पाप बिचारा, कसा सोन्याचा टुकडा व्हता वं !-लै वंगाळ झालं .. ).. तेची बायको हाय न्हवं का ही! म्हून म्हनतुया - अवो, ती गांधी बाबाची नातसून हाय!
सम्दं कळ्ळं काय? - अंगाश्शी!

संमिश्र भावना

मेघदूत [15 Jun 2007 रोजी 19:43 वा.]

खरं म्हणजे आत्ताचे राष्ट्रपती एवढे कर्तुत्ववान आहेत की ते सोडून जाणार याचेच दु:ख होतेय. शिवाय त्यांच्या नतर त्या पदासाठी जी नावे होती त्यामध्ये त्यांच्या तोडीचे नाव नव्हतेच.

राजकीय वलय नसलेली व्यक्ती राष्ट्रपती असावी असे वाटत होते, पण आता राष्ट्रपती ही काँग्रेस धार्जिणाच (धार्जिणीच ) आहे, आणि स्वत: सोनियाजींनीच त्यांची निवड केली म्हटल्यावर प्रश्नच मिटला !

परंतु, अर्थात मराठी महिला राष्ट्रपती होण्याची शक्यता आहे, याचा अभिमान आहेच.

कुठलेही अधिकाराचे सरकारी पद न भूषविता सार्‍या देशावर सत्ता गाजवणार्‍या सोनियाजींना मानाचा मुजरा !

सोनिया गांधींचा मार्ग प्रशस्त...

विसुनाना [16 Jun 2007 रोजी 07:15 वा.]

"तुम्ही देशाच्या पंतप्रधान होऊ शकत नाही" हे सांगण्याची हिंमत पुढच्या राष्ट्राध्यक्षांकडे असेल का?

अग्रलेख

विकास [16 Jun 2007 रोजी 20:19 वा.]

म.टा.च्या अग्रलेखातील काही भागः

....केंदीय वीजमंत्री सुशीलकुमार शिंदे, परराष्ट्रमंत्री प्रणव मुकजीर्, करण सिंग यांचीही नावे चचेर्त होती, या सर्वांना प्रतिभाताईंनी मागे टाकले, यात त्यांच्या स्वत:च्या कर्तृत्वापेक्षा परिस्थितीची अपरिहार्यता आणि त्याहून महत्त्वाचे म्हणजे गांधी कुटुंबाशी निष्ठा हे घटक निर्णायक ठरले असावेत. प्रतिभाताई साडेचार दशके राजकारणात आहेत, पण इतिहासात चिरस्थायी व्हावी, अशी कोणतीही नेत्रदीपक कामगिरी त्यांच्या गाठीेशी नाही. तीन वर्षांपूवीर् केंदात काँग्रेसच्या नेतृत्वाखालील सरकार आले, तेव्हा अनेक राज्यपालांच्या नव्याने नेमणुका झाल्या. त्यावेळी सुशीलकुमार शिंदे व एस. एम. कृष्णा यांची तात्पुरती 'सोय' लावण्यासाठी तर प्रतिभाताईंना 'पेन्शनी'साठी राज्यपालपदे मिळाली. त्यावेळीही महाराष्ट्रात आपल्याला 'स्थान' मिळावे, अशी प्रतिभाताईंची इच्छा होतीच. पण ती पुरी झाली नाही. आता मात्र सर्वात मोठ्या पदासाठी त्यांचा विचार झाला. देशाचा कारभार आपल्या ताब्यात व कह्यात ठेवायचा, तर सवोर्च्च पदावर आपल्या मजीर्तील व्यक्ती असावी, असा विचार काँग्रेस हायकमांडने नेहमीच केला आहे. त्यामुळेच कधी फक्रुद्दीन अली अहमद, कधी ग्यानी झैल सिंह तर कधी डॉ. शंकर दयाल शर्मा यांची वणीर् लागली. जेव्हा आपल्या मजीर्तील उमेदवार मिळाला नाही, तेव्हा व्ही. व्ही. गिरी यांना 'बंडखोर' बनवून विजयी करण्याचा यशस्वी डाव इंदिरा गांधींनी रचला. 'मजीर्तील राष्ट्रपती' या सूत्रामुळेच प्रतिभाताईंना उमेदवारी मिळाली. अर्थात राजकारणात एका व्यक्तीवर वा कुटुंबावर निष्ठा बाळगून काम करणारे कमी नाहीत. इंदिरा गांधी, राजीव गांधी व आता सोनिया या तिघांच्या पडत्या काळातही प्रतिभाताई त्यांच्या बाजूने निमूटपणे काम करत राहिल्या. या निष्ठेचे उचित तेच पारितोषिक त्यांना सोनियांनी दिले आहे. मराठी समाजापुरते बोलायचे, तर एक 'महाराष्ट्र-कन्या' राष्ट्रपती होण्याची शक्यता आहे. त्यांचा निवडणुकीचा मार्ग निष्कंटक असेल, अशी अपेक्षा आहे...

आणि हा सामन्याच्या अग्रलेखाचा दुवा: बिनदाताचा वाघ्या

भैरोसिंग शेखावतही...

एकलव्य [16 Jun 2007 रोजी 21:05 वा.]

... सोनियांना "तुम्ही देशाच्या पंतप्रधान होऊ शकत नाही" असे सांगणार नाहीत असे वाटते.

आपल्याला काय फरक पडतो?

विसोबा खेचर [17 Jun 2007 रोजी 02:22 वा.]

राष्ट्रपती कुणीही का असेना, आपल्या दैनंदिन आयुष्यात काय फरक पडणार आहे? खेडोपाडी बारा बारा, सोळा सोळा तास सुरू असलेलं लोडशेडिंग त्यामुळे थोडंच कमी होणार आहे? सरकारी कार्यालयातला भ्रष्टाचार थांबणार आहे? कलामसाहेब होते म्हणून तरी आपल्याला काय असा फरक पडला?

तात्या.

सहमत ! पण ...

प्रा.डॉ.दिलीप बिरुटे [17 Jun 2007 रोजी 03:39 वा.]

आम्हालाही असेच म्हणायचे होते !
पंतप्रधान कसे होता येईल ! यासाठी चे हे डावपेच आहेत,म्हणतात ? अर्थात पंतप्रधान कोणीही झाले तर फरक काय पडणार ? या विचाराशी आम्ही तेव्हाही सहमत असू. ! (शरद पवार पंतप्रधान झाले तर,उपक्रमीच्या वतीने मला बूके(फूलांचा गुच्छ्) घेऊन बारामतीला पाठवावे ही नम्र विनंती ;)

प्रा.डॉ.दिलीप बिरुटे

सरसेनापती तात्यासाहेब ठाकरे

एकलव्य [26 Jun 2007 रोजी 04:17 वा.]

राष्ट्रपतीपदी कोण बसेल ते बसो. देशाच्या जीवनावर त्याचा काहीच परिणाम होणार नाही...
सामना संपादकीय (२५ जून २००७)

तात्यासाहेब की बाळासाहेब?

दोन दिसांची नाती [26 Jun 2007 रोजी 04:20 वा.]

च्यामारी बाळासाहेबांना हल्ली तात्यासाहेब म्हणायला लागले की काय? ;)

आपला,
बाळासाहेब अभ्यंकर!

हा हा हा

गुंडोपंत [17 Jun 2007 रोजी 04:28 वा.]

(शरद पवार पंतप्रधान झाले तर,उपक्रमीच्या वतीने मला बूके(फूलांचा गुच्छ्) घेऊन बारामतीला पाठवावे ही नम्र विनंती ;)

शरद पवार पंतप्रधान झाले तर - हा आजचा खास विनोद!
-गुंडोपंत

प्रतिभाताई आणि प्रजापिता ब्रह्मकुमारी?

प्रकाश घाटपांडे [29 Jun 2007 रोजी 16:09 वा.]

दैनिक सकाळ दि २७ जून २००७ ची खालील बातमी वाचा

"प्रजापिता'चे दिवंगत संस्थापक माझ्याशी "बोलले' - प्रतिभा पाटील

माउंट अबू, ता. २६ - ""प्रजापिता ब्रह्मकुमारी संस्थेचे संस्थापक (कै.) लेखराज माझ्याशी बोलले आणि "मोठी जबाबदारी' पेलण्यास तयार व्हा, असा आशीर्वाद त्यांनी मला दिला,'' असे विधान संयुक्त पुरोगामी आघाडीच्या राष्ट्रपतिपदाच्या उमेदवार प्रतिभा पाटील यांनी एका दूरचित्रवाहिनीला दिलेल्या मुलाखतीत केले. त्यांच्या या विधानामुळे पुन्हा नव्याने वाद होण्याची शक्‍यता आहे. ....
या मुलाखतीत श्रीमती पाटील म्हणाल्या, ""प्रजापिता ब्रह्मकुमारी ईश्‍वरीय विद्यापीठाच्या प्रमुख दादीजी हृदयमोहिनीजी यांना भेटण्यासाठी मी माऊंट अबू येथे गेले होते. त्या वेळी "ब्रह्मकुमारी'चे संस्थापक (कै.) लेखराज त्यांच्या अंगात आले. त्याच वेळी ते माझ्याशीही बोलले. ते मला म्हणाले, की "मोठी जबाबदारी' पेलण्यासाठी सज्ज हो! यामुळे मी स्वतःला खूप खूप भाग्यवान समजते.''
लेखराज यांचे १९६९ मध्ये निधन झाले आहे.

आता डावे काय करणार?
प्रतिभा पाटील यांच्या या विधानामुळे नवा वाद निर्माण होण्याची शक्‍यता आहे. यापूर्वीही बुरखा पद्धतीबाबत केलेल्या वादग्रस्त विधानांनी पाटील अडचणीत आल्या होत्या. सत्यसाईबाबांचे भक्त असल्यामुळे केंद्रीय गृहमंत्री शिवराज पाटील यांच्या उमेदवारीला डाव्या पक्षांनी विरोध केला होता. त्याचमुळे कॉंग्रेसला प्रतिभा पाटील यांची निवड करावी लागली होती. त्यामुळे पाटील यांच्या या विधानावर डावे या भूमिका घेतात, याची उत्सुकता आहे.