मुख्य पानई सकाळ विशेष

हातगाडीवाल्याचा मुलगा झाला सी. ए.
-
Tuesday, July 20, 2010 AT 12:50 AM (IST)
Tags: sandeep ghodke, chartered accountant, north maharashtra

आनंद सपकाळे
भुसावळ - घरची परिस्थिती कितीही गरिबीची असली तरी मनात मोठे स्वप्न पाहण्याची उर्मी असेल, स्वप्नपूर्तीसाठी प्रचंड मेहनत करण्याची जिद्द असेल तर असाध्य ते साध्य होऊ शकते, हे येथील एका हातगाडीवाल्याच्या मुलाने दाखवून दिले आहे. त्याचा मुलगा सी. ए. (चार्टर्ड अकाऊंटंट) झाला आहे. सी. ए. झालेल्या संदीप रमेश घोडके या युवकाची ही कहाणी आहे.

इंटरनेटवर आज या परीक्षेचा निकाल लागला. त्यात संदीप उत्तीर्ण झाल्याचे कळताच कळताच त्याच्या आईवडिलांच्या आनंदाला पारावार राहिला नाही. संदीपचे प्राथमिक शिक्षण येथील जिजामाता प्राथमिक विद्यामंदिरात, तर माध्यमिक शिक्षण महाराणा प्रताप विद्यालयात झाले. दहावीनंतर त्याने येथील नाहाटा महाविद्यालयात प्रवेश घेतला. संदीपने बारावीच्या परीक्षेत चांगले गुण मिळवले. अकाऊंट विषयात तो तालुक्‍यातून प्रथम आला. नाहाटा महाविद्यालयातील प्राध्यापक डी. एम. राठी व जळगाव येथील चार्टंर्ड अकाऊंटंट गोपाल सी. पांडे यांनी सी. ए करण्याचा सल्ला आणि प्रेरणा दिल्याचे संदीप सांगतो. फाऊंडेशन कोर्सनंतर संदीप ट्रेनिंगसाठी मुंबईला गेला. तुटपुंज्या पैशात आपल्या गरजा कमी केल्या. जास्तीत जास्त काटकसर करून "आर.जेथलिया अँड कंपनी'त (फोर्ट) तीन वर्षांचा प्रशिक्षण पूर्ण केले.

आईवडील व दोन बहिणी असा संदीपचा परिवार आहे. दोन बहिणी सध्या महाविद्यालयीन शिक्षण घेत आहेत. वडील रमेश नेमिनाथ घोडके हातगाडीवर हंगामी व्यवसाय करतात. उन्हाळ्यात कुल्फी, पावसाळ्यात रांगोळी, रक्षाबंधनावेळी राख्या, गणेशोत्सवात हातगाडीवर गणेशमूर्तींची विक्री करतात. कुटुंबाच्या उदरनिर्वाहासाठी एकाच व्यवसायावर अवलंबून राहता येत नाही. त्यामुळे हंगाम बदलला, की व्यवसायही बदलतो. चार पैशांची कमाई व्हावी, हाच त्यामागचा उद्देश असतो. या संघर्षातून मिळणाऱ्या मिळकतीवर कुटुंबाचा चरितार्थ चालवतो, असे ते सांगतात. वडिलांचा हा नित्य संघर्ष संदीपने लहानपणापासून पाहिलेला. त्यामुळे अडीअडचणीच्या वेळी वडिलांना व्यवसायात त्याने मदत केली आहे.

आयुष्यात येणाऱ्या अडीअडचणी म्हणजे एक प्रकारची परीक्षाच असते. ध्येय गाठण्यासाठी कितीही अडथळे आले तरी दृढनिश्‍चयाने आपण ठरवलेली वाट सोडायची नसते, असे वडील नेहमी सांगतात. त्यामुळे मी जिद्द, चिकाटीने शिकायचे ठरविले, असे संदीप सांगतो. प्रशिक्षण काळात मुंबईला आर. जेथलिया कंपनीत खूपच शिकायला मिळाले. त्यात व्यावसायिक प्रशिक्षणासोबत व्यक्तिमत्त्व विकास व इतरही अनेक गोष्टींचे शिक्षण मिळाले. या यशात आईवडिलांचा मोलाचा वाटा आहे. रोज सकाळी चारला अभ्यासासाठी उठवण्याची सवय आईने लावली. परीस्थितीवर मात करण्याचे मानसिक धाडस बाबांकडून मिळाले, असे संदीप सांगतो.

घरात शिक्षणाच्या कोणत्याही सुविधा नसताना केवळ दृढविश्‍वास व मेहनतीच्या जोरावर संदीपचे सी. ए. होणे ही गोष्ट खरोखरच कौतुकास्पद आहे. अत्यंत तुटपुंज्या मिळकतीतही आयुष्याचा गाडा सांभाळत मुलांना अभ्यासाचे योग्य संस्कार दिले. योग्य संस्कार, मेहनतीमुळे माझा मुलगा सी. ए.ची परीक्षा पास होऊ शकला. मी आयुष्यभर केलेल्या श्रमाचे चीज झाल्याचे रमेश घोडके यांनी सांगितले. भविष्यात एक नामांकित चार्टर्ड अकाऊंटंट होण्याचे संदीपचे स्वप्न आहे.

दहावीत कमी गुण
वास्तविक दहावीच्या परीक्षेत संदीपला खूपच कमी गुण मिळाले. त्यामुळे नाराज न होता त्याने तेव्हाच खूप अभ्यास करण्याचा, जीवनात काही तरी करून दाखवायचा निश्‍चय केला. त्यानुसार अकरावीपासूनच अभ्यासाची जोरदार तयारी सुरू केली.