सध्या दूरदर्शनवर 'जॉय ऑफ विक' ची जाहिरात बर्‍याच वेळा दाखवली जाते. ती जाहिरात बघतांना शाळेत शिकलेल्या एका कवितेतली ही 'घेता घेता एक दिवस देण्यार्‍याचे हातच घ्यावे' ओळ आठवली. त्याच बरोबर 'देण्यातला आनंद' काय असतो ह्याचे नकळत झालेल्या संस्काराच्या आठवणींचा बांध फूटला.
काही अपेक्षा न करता काम करत जायचे. जेवढे देता येईल तेवढे देत जायचे. देतांना चांगल्याच गोष्टी द्यायच्या. असो.

मागच्या आठवडयात ३+३+३, म्हणजे ३ दिवस सुट्टी + ३ दिवस काम + ३ दिवस सुट्टी! मधले ३ दिवस मी सुट्टी घेतली होती. त्यामुळे चांगली सलग ९ दिवसांची सुट्टी मिळाली. सुट्टीवरून परत आल्यावर ऑफिसमध्ये 'जॉय ऑफ गिव्हिंग' साठी ५, ६ आणि ७ ह्या तारखा आहे आणि तुम्ही काय काय देऊ शकता ह्याची माहिती दिलेला ईमेल आलेला होता.त्यात नविन-जुने कपडे आणि शाळेतल्या मुला मुलींन साठी लागणारे लिखाणाचे साहित्य ह्या गोष्टिंचा समाविष्ट केला होता. ह्या आपण दिलेल्या वस्तूंचे काय करणार ह्याची माहितीपण दिली होती. ह्या वस्तू एका सेवाभावी संस्थेला देणार होते आणि ती संस्था गरजू वक्तींना त्या वस्तू देणार होते.

मी पण काही कपडे काढले जे मला देता येणार होते असे. हे कपडे बाजूला काढतांना बरीच मनाची घालमेल होत होती. हा कपडा चांगला आहे पण आता होत नाही म्हणून बरेच दिवस कपाटात तसाच पडलेला आहे. कपड्यात गुंतलेले मन बाजूला केले आणि 'देण्यासाठी' कपडे बाहेर काढले.

नंतर लेखन सामुग्री बाहेर काढली. लक्षात आले न वापरातले बरेच पेन, पेन्सिल आहेत.

ह्या सगळ्या वस्तू एकत्र केल्या आणि ऑफिसमधे ठेवलेल्या एका मोठ्या डब्बात ठेवल्या.

बर्‍याच चांगला प्रतिसाद ह्या 'जॉय ऑफ गिव्हिंग'ला मिळाला होता.

काही दिवसांपूर्वि बिल क्लिंटनचे 'गिव्हिंग' हे पुस्तक वाचले होते. त्यात त्यांनी 'गिव्हिंग' बद्द्ल बरेच मुद्दे चांगल्या प्रकारे मांडले होते. म्हणेज मला ते पटले होते. 'Unique global giver is world Bicycle Relief' बद्द्लची माहिती वाचली त्यावेळेसच मला एक ई-मेल आला मुंबईचे काहीजण जून्या सायकली गोळा करतात आणि आदिवासी पाड्यांवरच्या मुला-मुलींना देतात. जुन्या सायकली दुरूस्त करण्याची जबाबदारी त्या गोळा करणार्‍या मुलांचीच. माझ्याकडे सायकल नसल्या कारणाने ह्या प्रकल्पात भाग घेता आला नाही, फक्त आलेला ईमेल 'फॉरवर्ड' करण्याचेच काम केले. विकत घेऊन देता येण्यासारखे होते! पण नाही केले. असो.

सध्या निवडणूकेचे चांगलेच जोरात वारे वाहात आहे. पुढारी मंडळी बरेच काही 'देत' आहे. त्याबद्द्ल्यात आपले 'अनमोल मत' मागत आहे. हे मत आपण आपल्यापरीने कोणाच्या आश्वासनांना बळी न पडता योग्यरित्या द्याल हीच अपेक्षा!

आणि मत 'देण्यातला आनंद' मिळवा!!