भाषातज्ज्ञ डॉ. अशोक केळकर यांना 'रुजुवात' या लेखसंग्रहासाठी साहित्य अकादमी पुरस्कार जाहीर झाला आहे. लोकवाड्मय गृहानं हे पुस्तक प्रकाशित केलं आहे. वाङ्मयाची आणि कलेची आस्वाद मीमांसा आणि समीक्षा या विषयांतल्या केळकरांच्या काही लेखांचं संकलन या पुस्तकात आहे.

म्हैसूरची भारतीय भाषा संस्था (सेंट्रल इन्स्टिट्यूट ऑफ इंडिअन लँग्वेजेस), मुंबईची राज्य मराठी विकास संस्था, पुण्याची मराठी अभ्यास परिषद अशा संस्थांमागे केळकरांची प्रेरणा आणि त्यांचा सक्रीय सहभाग राहिला आहे. वैखरी, मध्यमा वगैरे त्यांची भाषाविषयक पुस्तकंही मराठीत यापूर्वी रसिकप्रिय झाली आहेत. अनेक सोपे आणि चपखल पारिभाषिक शब्द हेही त्यांचं मराठी भाषेसाठीचं एक महत्त्वाचं योगदान ठरावं. केळकरांचा आंतरक्षेत्रीय व्यासंग आणि उदार, अभिनिवेशरहित भूमिका समकालीन मराठी वाड्मयक्षेत्रात उल्लेखनीय मानली जाते. उपक्रमींना ही बातमी वाचून आनंद होईल अशी आशा आहे. त्या निमित्तानं लोकसत्तेत आलेल्या दोन लेखांचे दुवे देत आहे.

आस्वादमीमांसेचा भाषाविद् - प्र. ना. परांजपे
भाषेचे सर्वस्पर्शित्व जाणणारा विचारवंत - नीलिमा गुंडी

त्यांचं इंग्रजीतलं लेखन या दुव्यावर उपलब्ध आहे.