फारशी आणि संस्कृत ह्या भाषांमध्ये आदानप्रदान झाल्याचे दाखले मला माहिती नाहीत. जुनी फारशी आणि संस्कृत ह्या अगदी सख्ख्या भाषाभगिनी आहेत, असे मला वाटते. त्यामुळे खस्त आणि कष्ट ह्या दोहोंतले साम्य साहजिक आहे, अनपेक्षित नाही. पण खस्ता हा शब्द फारशीतल्या खस्तन ह्या मसदराचे (धातू) एक रूप आहे. तुम्ही वर दिलेले शब्द तसेच जास्त आणि वास्त ह्या शब्दांची खातरजमा करून सांगीन.

जाताजाता आपल्या नेहमीच्या भाषेतले आणखी काही फारशी शब्द ---

रफ्तपासून (जाणे)--> रफ्तार, रफ्ता (रफ्ता-रफ्तामधला), रवाना, रवानगी, रौ (प्रवाह)
गुफ्तपासून (बोलणे)--> गुफ्तगू, गुफ्तार (बेजान हुस्न में कहां गुफ्तार की अदा), गोया (तुम मेरे पास बैठे हो गोया--जैसे के बोल रहे हो) , गो (कानूगोमधला)
बस्तन (बांधणे)--> बस्तान, बस्ता (लग्नबस्ता आठवा) , बंदोबस्त

खस्ता हा पारशी शब्द आहे. वास्ता हा अरबी शब्द(वासिता) यावरुन आला आहे. ( संबंध,नाते, हा अर्थ )
वाहवाह हा पारशी शब्द, मराठीत त्याचा आपण वाहवा केला, बरोबर का ?

अवांतर :) पारसी,फारसी,की फार्सी उगाच गुंता वाढवून घेतला आम्ही ! :)

भाषाशास्त्रातील माझे ज्ञान शून्य तरीही जर ख अक्षराबद्दल प्रश्न असेल तर ते जुन्या पर्शियनमध्ये असावे का?

प्रसिद्ध पर्शियन सम्राट झेरेक्सिस (ग्रीक उच्चार) याचे पर्शियन उच्चाराप्रमाणे नाव खशायर शहा असे होते.

मागे एकदा पर्शियन १ ते १० आकडे वाचले होते ते पुन्हा चाळले

अचूक उच्चार माहित नाहीत.

सफ्र = ०
येक
दो
से =३
चहार
पंज
शेश (शेष)
हफ्त = ७ (हफ्ता यावरून आला असावा)
हष्ट (अष्टप्रमाणेच)
नोह्
दह्

"मँडॅरीन" हा मूळ संस्कृत शब्द पोर्तुगिजातून (चीन विषयी) इंग्रजीत गेला.

"मँडॅरीन" बोलीला खुद्द मँडॅरीनमध्ये प्हू-थोङ्-हुआ असे म्हणतात (किंवा हान्-यू, गुओ-यू - गुंडोपंत चुकल्यास दुरुस्त करा).

ही चीनच्या सम्राटाच्या "मंत्र्यांची" भाषा.
संस्कृत "मंत्री" शब्द, पोर्तुगीजमधे "mandarim" (उच्चार मन्दारीं) असा गेला, तिथून इंग्रजीत mandarin.

इंग्रजीत "उच्चपदस्थ नोकरशहा" या मूळ अर्थानेही "mandarin" हा शब्द वापरात आहे.