भाग-१ मध्ये आपण पाहिलेले ठळक मुद्दे:

• मोठ्या उद्योगांमध्ये अनेक विभाग असतात. प्रत्येक विभागाचा हिशोब/जमाखर्च वगैरे सांभाळायला त्यांचे स्वतःचे सॉफ्टवेअर्स असत. परंतु यात दोन विभागांचा एकमेकांशी संवाद तर नसेच शिवाय एकमेकांकडील आवश्यक विदा उपलब्ध नसल्याने जास्त वेळ जात असे.
• ई.आर्.पी प्रणाली हा एकच मोठ्ठा सॉफ्टवेअर नसून अनेक छोट्या सॉफ्टवेअरने बनलेली, "समान विदा" वापरणारी प्रणाली आहे.
• ई.आर्.पी प्रणाली ही विविध व्यावसायिक गरजा / प्रोसेसेस यांना डोळ्यासमोर ठेवून त्यांना ऑटोमेट करून अनेक प्रकारचे फायदे उपलब्ध करून देते.

आता पुढे........
___________________________________________________________________________

गेल्या वेळी पाहिल्याप्रमाणे मोठ्या कंपन्यांच्या सोप्या व्यवस्थापनासाठी ओरॅकलसारख्या कंपनीने "ओरॅकल ऍप्लिकेशन" नावाची महाप्रचंड प्रणाली अस्तित्वात आणली. आधी म्हटल्याप्रमाणे हा एक सॉफ्टवेअर नाही किंवा कुणा एकाच तंत्रज्ञानावर आधारीत नाही. दररोजच्या व्यावसायिक क्रिया (बिझनेस प्रोसेसेस) ऑटोमेट करण्यासाठी नानाविध तंत्र, रचना वगैरेंनी बनलेली ही प्रणाली आहे. तांत्रिक दृष्ट्या पाहिलं तर या प्रणालीला कोणतेही तंत्रज्ञान वर्ज्य नाही. ओरॅकल फॉर्म्स-रिपोर्टस, ओरॅकल वर्कफ्लोज, ओ.ए.फ्रेमवर्क अश्या स्वतःच्या (होमग्रोन) प्रणाल्या असोत वा जावा-जे.एस्.पी असो वा एच्.टी.एम एल्., एक्स्.एम्.एल्. असो, ओरॅकल ऍप्समधे या (व यासारख्या अनेक) प्रणाल्या - भाषा -तंत्रे सढळहस्ते वापरण्यात आली आहेत. परंतु यातील काही तांत्रिक प्रणाल्यांवर (फॉर्म्स् , रिपोर्टस, वर्कफ्लो इ.) भागांवर मी पुढील भागांत प्रकाश टाकणार आहे. या भागात ओरॅकल ऍप्सची मॉड्युल्स आणि विदा संरक्षण प्रणाली बद्दल पाहु.

ओरॅकल ऍप्लिकेशन हे विविध "मॉड्युल्स" ने बनलेले आहे. संपूर्ण व्यावसायिक प्रक्रिया विविध तर्कशुद्ध विभागात विभागता येतात. आपण ओरॅप्स मधील असे विभाग आणि त्याखाली येणारी मॉड्युल्स पुढील आकृतीमध्ये पाहू

आता वर दाखवल्याप्रमाणे इतक्या सगळ्या विभागांसाठी, त्यातील मॉड्युल्ससाठी एकच समान विदागार आहे. त्यामुळे विविध विभागांना एकमेकांना जोडणे अत्यंत सुकर होते. पूर्वी जे विभाग एकमेकांपासून संपर्करहित होते, त्यांना विविध प्रकारची माहिती उपलब्ध होणे सोपे जाऊ लागले. पण यामुळे एक वेगळा प्रश्न समोर आला तो म्हणजे विदा संरक्षणाचा. असा बराचसा विदा जो एखाद्या विभागाला गरजेचा नाही तो ही उपलब्ध होऊ लागलाच पण त्याशिवाय असा विदा जो काही ठराविक व्यक्ती सोडल्यास इतरांसाठी गोपनीय राहणे आवश्यक आहे तोही मिळण्याची भीती होती. उदा. जर प्रत्येक नोकरदाराला एकमेकांचे पगार समजले तर एकूणच होणार्‍या परिणामांचा विचार करा :).

यासाठी विविध पातळ्यांवर, विविध पद्धतीने विदा संरक्षण सांभाळले जाते जसे:
- युजर पातळी (वापरायचे नाव आणि परवलीचा शब्द)
- विदागार पातळी
- विविध मान्यता
- नेटवर्क पातळी
- ऑपरेटिंग युनिट पातळी
- मॉड्युल्स

यासाठी ओरॅप्स मध्ये काही विशेष सुविधा आहेतच पण विदागारातही विदयाचे विविध गट बनवले गेले (स्कीमा). 'ऍप्स' नावाच्या महा गटात सगळा विदा असेल परंतु वेगवेगळ्या विभागांना 'ऍप्स'चा विदा उपलब्ध न होता केवळ त्यांच्या गटाचा विदा उपलब्ध होईल याची काळजी घेण्यात आली. त्यासाठी गटांना त्या त्या भागाच्या वापराच्या विविध 'मान्यता' (ग्रॅन्ट्स) देण्यात आल्या. पुढील आकृती हे स्कीमा आणि ग्रॅन्ट्स स्ट्रक्चर (गट आणि मान्यता संरचना) स्पष्ट करेलच

परंतु ही झाली विदागारात घेतलेली काळजी. परंतू कोण त्या व्यक्तीला कोणत्या मॉड्युलचा ऍक्सेस द्यायचा वगैरे गोष्टी ओरॅकल ऍप्लिकेशनमध्ये ठरतात. त्यासाठी "युजरनेम" बरोबर एक "रिस्पॉन्सिबिलिटी" जोडली जाते व ती रिस्पॉन्सिबिलिटी एका विशिष्ट गटाला. म्हणजे ज्या युजरला ज्या रिस्पॉन्सिबिलिटीला ऍक्सेस असेल केवळ तितकाच विदा त्याला उपलब्ध होईल. मग एखाद्याला केवळ विदा "पाहण्यापुरता" ऍक्सेस द्यायचा की तो त्यात काही बदलही करू शकतो हे देखील रिस्पॉसिबिलीटीच ठरवते.

आपण एक उदाहरण घेऊ. समजा तुम्ही एका व्यवसायाच्या पेएबल्स डिपार्टमेंटमधे काम करताय. आता तुम्ही जर तेथील कारकून असाल तर तुमचे काम असेल, आलेल्या बिलां(इन्वॉइसेस) प्रणालीत नोंद करणे, व ती बिलं कोणत्या वस्तु/सर्विस साठी आहेत त्याची नोंद ठेवणे (पी.ओ. मॅचिंग), आणि पुढे ठरल्या दिवशी त्याचं पेमेंट करणे. यासाठी तुम्हाला इन्वॉइस "एंट्री"ची, तसेच इन्वॉइसमध्ये बदल करण्याची मान्यता असणे गरजेचे आहे. तसेच ती बिलं कोणत्या पर्चेस ऑर्डरकरिता आहेत हे पाहण्यासाठी "पर्चेस ऑर्डर" पाहण्यापुरती उपलब्ध होणे गरजेचे आहे. यासाठी तुमच्या युजरनेमला "इन्वॉइस एंट्री" व "पीओ इन्क्वायरी" या रिस्पॉन्सिबिलिटिज देता येतील. तुमच्या मॅनेजरला यापेक्षा विस्ट्रुत ऍक्सेस देता येईल तर इतर खात्यातील लोकांना तुमच्या घडामोडींचा "बघण्यापुरता" ऍक्सेस देता येणं शक्य आहे.

खरंतर ह्या विदा संरक्षणाबद्दल फार खोलात शिरावंसं वाटतंय परंतु विस्तारभयापेक्षा केवळ तोंडओळख असलेल्या लेखात प्रत्येक विषयाच्या गाभ्यात शिरणं अप्रस्तुत वाटतं. तेव्हा तूर्तास इथेच थांबतो. पुढील भागात ओरॅप्सची तांत्रिक संरचना पाहू

(क्रमशः)