सकाळ मध्ये आजच वाचले. ही बघा दैनिक सकाळची बातमी दि.२४/०१/२००८

मंगळावर मानवाचे अस्तित्व

न्यूयॉर्क, ता. २३ - मंगळावर मानवाचे अस्तित्व असल्याचे दर्शविणारे छायाचित्र "नासा'ला पाठविण्यात आल्याने मंगळाचे गूढ अधिकच वाढले आहे. ......
मंगळावरील एका टेकडीवर एक विवस्त्र महिला चालत असल्याचे छायाचित्र "नासा'ला पाठविण्यात आल्याचे वृत्त "डेली मेल'ने दिले आहे. या महिलेचे हात ताणलेले आहेत. याबाबत "नासा'ने अधिकृतपणे कोणतीही टिपण्णी केलेली नाही. या छायाचित्रात दिसणारी महिला खरी आहे की मंगळावरील एखादा दगड आहे यावर "नासा'ने काहीही सांगितले नाही. एका वेबसाईटच्या हवाल्याने हे वृत्त प्रसिद्ध झाले आहे. हे छायाचित्र पाहिल्यावर आमचा विश्वासच बसला नाही. विवस्त्र स्वरूपातील एक परजीव पाहून आम्हाला धक्‍का बसला, असे एका नागरिकाने या वेबसाईटला पाठविलेल्या मेलमध्ये म्हटले आहे.

फ्रान्सच्या शास्त्रज्ञांनी काही दिवसांपूर्वीच मंगळावर कोरड्या बर्फाचे ढग असल्याचे म्हटले होते. त्या पार्श्‍वभूमीवर हे वृत्त अधिकच गूढ निर्माण करणारे आहे. मंगळावरील बर्फाचे ढग काही वेळा इतके दाट होतात, की त्यामुळे मंगळावर गडद सावली पडते. मंगळावर कार्बन-डाय-ऑक्‍साईड असल्याचा पुरावा प्रथमच देणारे छायाचित्र या शास्त्रज्ञांनी दिले आहे.

प्रकाश घाटपांडे

दुवा बातमी ऐवजी चित्राचा आहे. बाई 'मंगळी' असाव्यात.

याआधीही मंगळावर मानवी चेहेर्‍यासदृश आकार दिसले होते. यात आपल्या परसेप्शनचा भाग अधिक असतो असे वाटते. आपल्याला जे आकार परिचित आहेत, ते आपल्याला आपोआप दिसू लागतात. दगडात देव दिसणे हे अजून एक उदाहरण. मंगळावर जीवसृष्टी नसेलच असे नाही, पण एकदम बाई कशी आली याचाही विचार करायला हवा. आणि खरेच बाई असेल तर आणखी खुणा दिसायला हव्यात. तिचे सहकारी, ते दुसरीकडून आले असतील तर त्यांचे यान इत्यादी.
----
"काय करणार? जुनी खोड. स्वतःलाही सोडलं नाही. नको ते प्रश्न, नको त्या शंका विचारणारच." -- मास्तर, सामना चित्रपटात.

ह्म्म! 'बाईच' दिसली...
एखादा जाडा बुवा नाही बरं का ;)

आपला
गुंडोपंत बुवा

मंगळीला पाहून अमेरिकन बिगफूट (सॅसक्वॅच)ची आठवण झाली. मंगळी अगदी त्याच आविर्भावात चालत्ये. ;-)

असो. मंगळीचा रंग आजूबाजूंच्या खडकांशी मिळता जुळता आहे.

अवांतरः नारायण धारप यांचे मंगळावरील माणसे असे काहीसे पुस्तक होते बहुधा. खूप लहानपणी वाचलेले होते, अतिशय मजेदार. त्यातील मंगळे हिरव्या रंगाचे असतात. वरील चित्रातील मंगळीच्या रंगाशी साधर्म्य साधणारे. ;-) धारपही सूक्ष्मदेहाने मंगळावर गेले होते का काय असा गूढ प्रश्न पडला. :))

मला तरी एखादा दगडाचा आकार वाटतोय.. हे म्हणजे चंद्रवरच्या सशाची गत झाली :प्
बाकी मंगळावरील भेगा कालवे नाहित हे सिद्ध करायला इतकी वर्षे गेली. तर् हि इतकीशी मंगळी बरी दिसली त्यांना

-ऋषिकेश

आधीच हे चित्र इतकं छोटं आणि धुसर आहे की त्यातली ती आकृती बाईचीच आहे कशाच्या आधारावर सांगत आहेत?
मलातर तो आपल्या धोनीसारखा बुवा वाटत आहे बॉ.

ही जोगीण (नन) बँक लुटण्याचा विचार करीत आहे - मुखवट्याचा आकार समोरून ढगळ असता तर बुरखा मानला असता.
तरी चालण्याच्या ढबेवरून ननचा वेष केलेला एक कापुचिन भिक्षुक (पुरुष) असण्याची शक्यता नकारता येत नाही.

कारण मेन आर फ्रॉम मार्स अँड विमेन आर फ्रॉम विनस. त्यामुळे ती मंगळावरची बाई कशी असेल? ;-) ह. घ्या.

मराठी असे आमुची मायबोली तिला बैसवूं वैभवाच्या शिरी |
***********************************
हे चित्र मंगळावर उतरलेल्या यानाने घेतले की मंगळाभोवती फिरणार्‍या? या विषयी मी अनभिज्ञ आहे.
भ्रमण करणार्‍या यानातून घेतले असेल तर ते एका खड्ड्याचे चित्र असावे.आपल्याला परिचित असतात तेच आकार दिसतात. या श्री.राजेंद्र यांच्या विचाराशी मी सहमत आहे. बहुतेक वेळा आपल्याला मानवी आकार दिसतो.
(अज्ञानी)...यनावाला.

म.टा.च्या खालील अग्रलेखातील "घृणाक्षरन्याय" हा शब्द मला आवडला.

मंगळावरील छायाखेळ
26 Jan 2008, 0010 hrs IST

लाल रंगाने सर्वांचेच लक्ष वेधून घेणारा मंगळ हा ग्रह पुन्हा चर्चेत आला आहे. काही लोक कोणत्या ना कोणत्या कारणाने प्रसिद्धीच्या झोतात राहात असतात. मंगळाचेही तसेच आहे. या ग्रहाबाबत भारतीय जनमानसात धाक असला, तरी त्याची कारणे निराळी आहेत. परंतु गमतीचा भाग असा की ही भीती असतानाच त्या ग्रहाबाबतचे सुप्त आकर्षणही लोकांत आहे आणि ते जगभरच आहे. याचे एक महत्त्वाचे कारण म्हणजे या ग्रहावर सजीवसृष्टी असावी, आता नसली तरी पूवीर् असावी, असा एक ठाम समज आहे. या समजातूनच या ग्रहाची निरीक्षणे करणाऱ्यांना तिथे अकस्मातपणे काहीतरी आढळते. तसेच ते आताही दिसले आहे. यावेळी निरीक्षकांना आपला हात लांब केलेली एक नग्न महिलाच दिसली आहे. असे काही दिसण्याची ही पहिलीच वेळ नाही. एकोणिसाव्या शतकाच्या अखेरीला मंगळावर सजीवसृष्टी असण्याची शक्यता आहे, असे काही खगोलशास्त्रज्ञांना वाटत होते. पेसिर्व्हल लॉवेल या खगोलशास्त्रज्ञाने तर मंगळावर सजीवसृष्टी आहे; पण ती मरणाच्या वाटेवर आहे, असे आपल्या ग्रंथात म्हटले होते. त्यावेळी जगभर खळबळ उडाली. हौशी खगोल निरीक्षकांच्या दुबिर्णी मंगळाकडे रोखल्या गेल्या. मग कोणाला मंगळावर रेषा आहेत आणि त्या रेषांमध्ये परमेश्वराचे नाव कोरले आहे असे दिसू लागले. कोणाला मंगळवासीयांनी समस्त विश्वालाच पाठविलेला संदेश त्या रेषांमध्ये दिसू लागला. मंगळावर कालवे आहेत, असाही काहींचा समज होता. या साऱ्याला छेद मिळत गेला, तो गेल्या शतकामध्ये नासा या अमेरिकेच्या संस्थेने मंगळाचे जवळून निरीक्षण करायचे ठरवल्यावर. नासाचे मरीनर ४ हे अवकाशयान जुलै १९६५मध्ये मंगळाजवळ पोचले. त्या आणि नंतरच्या मरीनर ६ आणि ७ या यानांनी पाठविलेल्या छायाचित्रांवरून त्या ग्रहाबाबतचे सर्व अंदाज खोटे ठरवले. तरीसुद्धा मंगळाचा शोध सुरूच राहिला. आता तर मंगळावर माणूस पाठविण्याच्या गोष्टी होऊ लागल्या आहेत. त्या ग्रहाची जी छायाचित्रे प्रसिद्ध झाली आहेत, त्यावरून तिथे सारे वैराणच असल्याचे दिसते. तरीही काही निरीक्षकांना अधूनमधून आशा पल्लवित करणाऱ्या गोष्टी दिसतात. परंतु संस्कृतमध्ये जे विविध न्याय सांगितले आहेत, त्यामध्ये घृणाक्षरन्याय आहे. हा न्याय असे सांगतो की किड्याने कोरलेल्या लाकडाच्या चित्रविचित्र आकृतीमध्ये एखादेवेळी एखाद्या अक्षराचे साम्य सहजगत्या आढळून आले तर तरी केवळ योगायोगाची गोष्ट समजायची. मंगळ या ग्रहावर आता दिसलेली हात लांब केलेल्या महिलेची आकृती अशीच योगायोगाची गोष्ट आहे. हा योगायोग घडण्यास त्या ग्रहाच्या आकाशामध्ये असलेले कार्बन डायऑक्साइडचे दाट ढग कारणीभूत असावेत, असा अंदाज आहे. या ढगांची सावली मंगळाच्या पृष्ठभागावर पडते. सावलीतून काही आकार तयार होतात. लहान मुलांना रमविण्यासाठी मोठी माणसे हाताने हरीण, उडणारा पक्षी अशा आकृती भिंतीवर दाखवतात. तो छायाप्रकाशाचा खेळ असतो. मंगळावरही यदृच्छेने छायाप्रकाशाचा हा खेळ चालू आहे आणि या विश्वात आपल्याला कोणी शेजारी आहे काय, याचा शोध घेणाऱ्या माणसाला त्यात आपल्या शेजाऱ्यांच्या सावल्या दिसू लागल्या आहेत. सहाशे कोटींहून अधिक लोकसंख्या असलेल्या माणसाला या अंतहीन विश्वाच्या अंधाऱ्या पोकळीत अंतर्यामी किती एकाकी वाटते आहे, त्याची ही एक लहानशी खूण आहे. या एकाकीपणातूनच त्याला छायाप्रकाशाचा खेळ मोहित करतो आणि मंगळावरच्या चर्चांना पुन्हा उधाण येते. सध्या ज्ञात असलेल्या माहितीच्या उजेडामध्ये मंगळाबाबतच्या ताज्या बातमीचा हाच अन्वयार्थ आहे.