मी क्वचित कधीतरी वाइन घेते आणि क्वचित एखादा फोटो कोणी क्लिकला तर माझी ना नाही पण मुद्दाम ग्लास वर करून माझा फोटो काढा असे मी कुणाला सांगणार नाही आणि सांगितले तरी तो स्वतः जाऊन सोशल नेटवर्किंग साइटवर पब्लिश करणार नाही.

आमी बी कवा कवा घेतो. आमच बी तुमच्यावानीच मत हाय!
प्रकाश घाटपांडे

अहो एवढच काय हल्ली स्वत:च्या रिलेशनशिप मध्ये काय होत नाही हे सुद्धा फेसबुक वर टाकायला मुलींना काहीच वाटत नाही.तो अमुक दिवशी भेटला,तमुक दिवशी असं बोलला,त्याचा राग आला इ.पण हा खरच विचित्र प्रकार आहे.आपण काय लिहितोय आणि त्याचे परिणाम काय आहेत् हे मुलींच्या दृष्टिने तर जास्त महत्त्वाचं आहे.

हाहाहा! तुमचे माझे नातेवाईक एकच तर नव्हे? ;-) एक किस्सा आठवला -

आमच्या कुटुंबातील एका ज्येष्ठ बाईंना त्यांच्या मुलीने फेबुची सहल करवली. या सहलीत त्यांना आमच्या कुटुंबातील एका मुलाचे (ज्याचे डिसेंबरात लग्न व्हायचे होते) सर्व गिल्लासधारी फोटु दिसले. त्यांनी सर्व कुटुंबाला फोन फिरवून सांगितले

"तो xxxxचा मुलगा साफ कामातून गेला आहे. फार पितो तो. कसे व्हायचे त्या मुलीचे?"

असो. ही बातमी बहुधा मुलीपर्यंत न पोहोचल्याने लग्न पार पडले. ;-)

मुद्दाम ग्लास वर करून माझा फोटो काढा असे मी कुणाला सांगणार नाही आणि सांगितले तरी तो स्वतः जाऊन सोशल नेटवर्किंग साइटवर पब्लिश करणार नाही.

अगदी.

तशी भरलेले ग्लास हिंदकळवण्याची फॅशन मराठी संकेतस्थळांवरही आहे बरं का! - उगीच सर्वांच्या माहितीसाठी. ;-)

फोटो काढणे ही माणसाची सहज प्रवृत्ती आहे असे वाटते.

चर्चा गंभीर नाही असा माझा समज होता म्हणून कैच्याकै प्रतिसाद दिला होता. गंभीर उत्तर द्यायचे झाले तर विषय बराच सापेक्ष आहे. प्रत्येकाची आवडनिवड वेगळी. ज्याला जसे वाटते/रूचते तसे त्याने/तिने करावे. यातून काही सिद्ध वगैरे होते असे वाटत नाही.

--
दृष्टीआडची सृष्टी
http://rbk137.blogspot.com/

१. अरे माझे किती मस्त चालले आहे बघ बघ हे दाखवायला
२. माझी अभिरुची किती उच्च आहे हे दाखवायला
३. मी किता हायक्लास आहे हे दाखवायला
४. माझ्या किती ओळख्यापाळख्या हे दाखवायला
५. एकमेकांची पाठ खाजवायला
६. थोडक्यात जाहिरात करायला

आम्ही मात्र फेसबुकावर मित्रांना भेटायला, आणि त्यांच्यापैकी किती हेपलतात हे बघायला, येतो. फेसबुकावर आमचे असंख्य जुने मित्र भेटले. त्यामुळे मी फेसबुकाचा आभारी आहे.
तुमच्या नातेवाईकांनी टाकलेले फोटो खासगी वितरणासाठी असल्यास असे फोटो टाकण्यात काही वावगे नाही असे माझे मत आहे. ( मित्रांसोबत बेवडा मारतानाचे आमचे काही जुने उघडबंब फोटो आहेत. ते टाकीन म्हणतो.)

"तुझं वाचन किती? तू बोलतोयस किती?"
"तुझा पगार किती? तू बोलतोयस किती?"

आताच माझे फेसबुक पान बघितले. मी स्वतः डकवलेले फोटो, आणि अन्य लोकांनी डकवलेले माझा सहभाग असलेले फोटो बघता काय दिसले? बरेचसे फोटो सहभोजन-प्रीतिभोजन प्रसंगांमधले होते. टेबलाबर किंवा हातात वाईनग्लास आहे असलेले कित्येक फोटो आहेत.

यात जाहिरात आहे असे काही मनातही नव्हते.

पण काहीतरी संदेशन होते, याबद्दल आंशिक सहमती आहे. उदाहरणार्थ, माझ्या फोटोंमध्ये कुठल्या फॅशनचे कपडे मी घालतो त्याबद्दल कोणाला काही कळू शकते. म्हणजे माझे काही मित्र बंद गळ्याचे शर्ट घालणे पसंत करतात, त्यांच्या पुष्कळ फोटोंमध्ये त्यांनी बंद गळ्याचे शर्ट घातलेले असतात. असा फोटो बघून कोणी "याला अशी फॅशन आवडते" असा संकेत घेतला तर अगदी काही चूक नाही. पण तरी "तो व्यक्ती फॅशनची जाहिरात करतो आहे" असे म्हणणेसुद्धा ठीक वाटत नाही.

तसेच हातात वाईनग्लास असण्याबाबत. माझ्या त्या सर्व फोटोंमध्ये "अमुक-अमुक मित्रांबरोबर आनंदी प्रसंग" असा प्रमुख हेतू होता. दुय्यम संकेत मिळतो, तरी "दारू पिण्याची जाहिरात" हा प्राथमिक हेतू नाही.

उपक्रमींना दारुऐवजी फेसबुक जास्त आवडते वाटते. मला नीटसं लिहिता येत नाही म्हणून चर्चा नीट मांडली गेली नाही. दारु पिण्यात आणि त्याची प्रसिद्धी करण्यात मोठेपणा का वाटतो अस विचारायच्ं होतं. मोठेपणा वाटतो म्हणुन माणसं फोटो लावतात. इथे तर सर्वांनी फेसबुकवर चर्चा सुरु केली.

@धनंजय - माणूस फोटो काढतो आपल्या आठवणींसाठी पण दुसर्‍यांना दाखवतो ते त्यांनी बघुन प्रशंसा करावी म्हणुन ना. म्हणजेच फोटो जाहीर करुन त्याला काहीतरी बदल्यात मिळवायचे असते म्हणुन मी जाहिरात म्हटलं.

@धनंजय - मांसाहाराबद्दल तुम्ही म्हणता ते मान्य आहे पण मांसाहाराची चटक लागली आणि दारुची चटक लागली या दोन्ही वाक्यात फरक वाटतो का?

दारुला अंमल आणणारा पदार्थ मानतात ना. तिच्या सेवनाने तोल सुटू शकतो. मांसाहाराने तसं होत नाही. आता मांसाहाराने तोल सुटतो असं मानल तर शाकाहारानेही सुटतो त्यामुळे भोजन बंद करावे हा उपाय नाही म्हणुन दारु आणि मांसाहार यात मला फरक वाटतो.

ग्लास वर करुन चीअर्सच्या थाटात फोटो काढला जातो तो फक्त आनंदमय वातावरण दाखवायला असं वाटत नाही. मी जर प्रेसिडेन्टसह फोटो काढला तर माझी प्रेसिडेन्टपर्यंत पोहोचायची ऐपत आहे किंवा त्यांच्याशी ओळख आहे हा माझा मोठेपणा आहे अस दाखवायचं असतं. ओळख नसताना सहज भेट झाली म्हणुन फोटो काढला तरी त्या फोटोतली ट्रॉफी प्रेसिडेन्ट असते तर मग दारुच्या फोटोतली ट्रॉफी दारु का नाही? आनंदमय वातावरण का? दोन्ही असू शकेल असं वाटत्.

माझ्या मुळ प्रश्नाचं उत्तर मिळालं नाही - दारु पिणे हे स्टेटस सिम्बॉल का मानले जाते?

हे स्टेटस सिंबॉल आजच नाही, पूर्वीपासून असावे.
सोमरसाचे पान देवांनाही प्रिय मग आपणच का नाही प्यायची, असा एक विचार आढळतो. :)

दुसरे एक असे की आजही बाटल्यांमध्ये मिळणारे मद्य हे तसे महाग, उंची पेय आहे. आपण मित्रांबरोबर बसून आनंद घेतो, हे लोकांना दाखवायला आवडते. आपण मित्रांना मद्य पाजतो, म्हणजे आपण उदार, आणि मित्रांबरोबर (तसेच मैत्रिणींबरोबर) मजा करू शकणारे, क्षण आनंदात घालवायला उत्सुक असणारे असे आहोत याची जाहिरात असते.

जसा तोटा असतो तसा याचा कधीकधी काही लोकांना फायदाही होत असावा. उदा. निवडणुकीत उमेदवार लोकांना "आपल्यातला" वाटणे महत्त्वाचे ठरते.

अमेरिकेचे अध्यक्ष जॉर्ज बुश आणि त्यांचे प्रतिस्पर्धी केरी यांच्यात जेव्हा चुरस होती, तेव्हाचे मत हे असे आहे.

President Bush, despite his many problems, strikes most of the American people as a pretty nice guy —... more standoffish Kerry projects little warmth. A recent Zogby/Williams Identity Poll reflected .. found that 57% of undecided voters would rather have a beer with Bush than Kerry. (In Bush's case, it would be a nonalcoholic beer.)

http://www.usatoday.com/news/opinion/columnist/benedetto/2004-09-17-bene...

त्याआधी, २००० मध्येही जॉर्ज बुश यांचे लोकांमधले अपील/ त्यांना सहज अप्रोच करता येणे हे महत्त्वाचे विषय होते.
According to a just-released Sam Adams/Roper Starch poll, more people would rather sit down to drink a beer with George Bush than Al Gore.
http://findarticles.com/p/articles/mi_m0EIN/is_2000_Oct_17/ai_66149137/

मांसाहाराचे थोडे तसेच आणि किंचित वेगळे आहे. आहारावरून माणसांचे कंपू ठरतात. त्यामुळे कंपूत प्रवेश करण्यासाठी आपला आहार दुसर्‍यांसारखा आहे किंवा आपल्याला हेही अप्रिय नाही, असे दाखवण्याची गरज वाटत असावी.

>>तुम्हाला अशाप्रकारे दारु पिताना आपले फोटो जाहीर करणे आवडते/पटते का?
लोकांचे न पटण्याचा/पटण्याचा संबंध नाही. कोणी लावले तर मी नावे का ठेवू? मला एखादी व्यक्ती दारू पिते/पीत नाही किंवा मांसाहार करते/करत नाही, यावरून तिच्याशी पटणे/न पटणे ठरत नाही.

फेसबुक ही सोशल नेटवर्किंगची साईट आहे, ती बरीचशी सार्वजनिक आहे. मी सार्वजनिक ठिकाणी जितपत माझ्या सगळ्या आवडीनिवडी उघड करण्याबाबत कॉन्शस असते, तेवढीच फेसबुकवर असते. त्याहून जास्त नाही, आणि कमी नाही. पण कोणी इतरांनी तसे केले तर करू देत असा माझा विचार असेल.

वर एच आर बद्दल विचार आला आहेच. तो खरा आहे, पण काही कामांसाठी नेटवर्किंग करता येणेही आवश्यक असते. आता फेसबुकावर ऍक्टिव्ह नाही म्हणून एखाद्या एच आर वाल्याने जर असे म्हटले की या माणसाला/व्यक्तीला मित्रच नाहीत, तर? किंवा नवीन टेक्नॉलॉजीचा वापर करू शकण्यात फारच जुनाट दिसतो/दिसते आहे, तर? तेव्हा एच आर वाल्यांनी अगदीच रेड फ्लॅग करण्यासारखे कोणी काही सातत्याने करत/बोलत/वागत करत असले, तर ठीक आहे, नाहीतर एच आरला किंवा कोण काय म्हणतील याला घाबरून, मन मारत जगण्याला काही अर्थ नाही.

तुमचे नातेवाईक असे का करतात हे माहिती नाही, पण माझे असे मत आहे की त्यांना जवळचे बरेच मित्र असावेत, आणि अधिकाधिक मित्र करून घेण्याची इच्छा आहे असे दिसते आहे.

मुळात् फेसबुकावर् लोक् सर्वप्रकारचे फोटो लावतात्. पार्टीत् फोटो घेणारे शेकड्याने असतात्, कोणी फोटो घेउ लागला तर् त्याला हसुन पोझ देणे यात् काही चुक् नाही. पार्टीत दारु पिताना कोणी फोटो काढला आणि त्यावेळी हसुन् ग्लास् दाखवला ('चीअर्स केले') तर त्यात काही चुक वाटत नाही.

पुर्वी कुठल्याही समारंभाचे फोटो इतरांना दाखवण्यात् जितका आनंद लोकांना होत होता तितकाच् आनंद अजुनही लोकांना होतो, फक्त फोटो काढणे पुर्वीइतके महाग् राहिले नाही आणि ते इतरांना दाखवणे अगदी सहज शक्य झाले आहे हा बदल् अनेकांना पचत नाही असे वाटते.

थोडक्यात दुसर्‍यांच्या फेसबुकावर् कसले कसले फोटो असतात याची चिंता इतर लोक् कशाला करतात हे मला न सुटलेलं कोडं आहे. उद्या ' लोक पोहायला जाताना उघडे होउनच का जातात् (अन् त्याचे फोटो फेसबुकावर् का लावतात्), तुम्ही लावता का, तुम्हाला आवडते का, तुम्हाला पटते का' यावरही चर्चा करुयात्. (अजुन् भरपूर् विषय आहेत, सवडीने घेउच)

-Nile

मी स्टेटस सिम्बॉल का मानले जाते असा प्रश्न केला होता.

चित्रा यांचे उत्तर - दुसरे एक असे की आजही बाटल्यांमध्ये मिळणारे मद्य हे तसे महाग, उंची पेय आहे. आपण मित्रांबरोबर बसून आनंद घेतो, हे लोकांना दाखवायला आवडते. आपण मित्रांना मद्य पाजतो, म्हणजे आपण उदार, आणि मित्रांबरोबर (तसेच मैत्रिणींबरोबर) मजा करू शकणारे, क्षण आनंदात घालवायला उत्सुक असणारे असे आहोत याची जाहिरात असते. - पटले. इतरांची उत्तरे वाचायला आवडतील.

मी चर्चेत लिहिल होतं - एक स्त्री नातेवाईक आणि दुसरा एक पुरुष नातेवाईकांच्या प्रत्येक फोटोत दारुचा हिंदकळणारा ग्लास दिसत होता. ही दोन वेगळी अकाउंट होते. हे दोघे दारुबाज नाहीत. मद्याचे फोटो फक्त पार्टीतच काढले जातात असे इथल्या काही लोकांना वाटलेले दिसते. मी फक्त तसे म्हटले नाही.

@Nile
तुम्हाला चर्चा निरर्थक वाटल्यास भाग घेऊ नका. जबरदस्ती नाही. इतर करत आहेत त्यांना करू द्या. चर्चा फेसबुकबद्दल नाही, दारु पिण्यात काय मोठेपण वाटते त्यावर आहे. मी विषय नीट मांडला नाही म्हणुन असे झाले.

'मी पितो' हे सांगण्यात प्रौढी मिरवण्यासारखे काही नाही. लपवण्यासारखेही काही नाही.
सन्जोप राव
तुमचा स्वभाव कसा आहे? गिरण्या बंद पडण्यापूर्वी कसा होता?

ग्लास दारूचा असेल किंवा पाण्याचा, तुम्ही जी गोष्ट समाजात करता तिची अजून जाहीर वाच्यता झाल्यास आक्षेप का आहे? हे म्हणजे कुठेतरी आपण पितो ह्या गोष्टीची टोचणी आहे, ती असेल तर पिउच नये.

आता ग्लास बरोबर असलेले फोटो हे मुद्दाम काढलेले नसतात. समारंभात लोक फोटो काढतात, त्यावेळी लोक एकतर खात असतात, पीत असतात किंवा बोलत असतात, ह्यापैकी एका वेळचे ते फोटो असू शकतात.

कोणी मुद्दाम एक दारूचा ग्लास असलेला फोटो काढत नाही, काढलाच तर चित्र विचित्र फोटो काढतात, अनेक ग्लास हातात घेतलेला किंवा एकूणच काहीतरी गमतीशीर प्रकार असतात.

आक्षेप गोष्टीची वाच्यता चुकीची आहे हा आहे कि चुकीच्या गोष्टीची वाच्यता हा आहे?

युरोट्रिप या चित्रपटातील दोन पात्रांना हशीश घातलेले केक खायचे असतात. त्यांना केवळ प्लॅसिबो इफेक्टनेच हशीश चढते.
धनंजय यांनी स्वतःचे उदाहरण दिले आहे ते मान्य आहे. परंतु, छायाचित्रातील कथावस्तूच दारू असल्याचे टिंकरबेल यांनी अनुभवलेले आहे असे मला वाटते. माझ्या अनेक मित्रांचेही मी असे निरीक्षण केले आहे की त्यांना दारू 'आवडण्यास आवडते'. मुळात, ऑर्कुट, फेसबुक (किंवा इंडियन आयडॉल, सारेगमप) या सार्‍यांचे मूळही "लोकांना आवडणारी वस्तू मला आवडलीच पाहिजे" असेच नाही काय?
--
मुळात दारूतून मिळतेच काय? 'हलके वाटते, बंधने मोकळी होतात' अशी अलंकारिक वर्णने अनेकांनी मला सांगितली आहेत पण मला कधीच तसे काही जाणवलेले नाही.
--
@चित्रा: फेसबुक/ऑर्कुटवर अनेकजण लीटस्पीकमध्ये नावे लिहितात, साध्या अक्षरांचा शोध घेऊन ती सापडणार नाहीत. नावाचा शोध बंद करण्याचीही सोय आहे असा माझा अंदाज आहे (माझे दोन्हीवरही खाते नाही). त्यामुळे खाते सापडले नाही तरी "याला मित्रच नाहीत" असा समज नोकरी देणारे करून घेऊ शकत नाहीत असे मला वाटते. (नोकरी देताना फेबु/ऑर्कुटचा निकष त्यांनी लावणे मात्र मला पटते.)

या चर्चेनिमित्त काही विस्कळीत विचार डोक्यात आले ते खाली लिहिते -

फेसबुकावर लोकांच प्रोफाइल तपासणार्‍या माझ्या बॉसला मी विचारले, "मग तुझे अकाउंट आहे का फेबुवर?" त्याने उत्तर दिले, "अर्थातच नाही. माझे काम, माझी तीन मुले, बायको, कुटुंब, मित्रमंडळी यांच्यात इतका गुंतलेला असतो की आणखी फेबुवर जाण्यास वेळ नाही आणि तिथून लोकांनी माझ्याबद्दल निष्कर्ष काढावे असे मला वाटतही नाही पण ही दुय्यम गोष्ट आहे. मला आवड नाही ही खरी गोष्ट." त्याचे उत्तर मला प्रामाणिक वाटले. कोणतेही एच-आर फेबुवर अकाउंट नाही म्हणून माणूस निरुपयोगी आहे असे ठरवते असे मला वाटत नाही.

----------

दारूचे सोडा पण फेबुवर दोन-तीन हजार मित्र मैत्रिणी बाळगणार्‍या व्यक्तीस* मीही नोकरी देणार नाही कारण इतके मित्र बाळगणारा माणूस लोकांशी फोनवर बोलणे, चॅट करणे यांत इतका बिझी असेल की कामे कधी करेल अशी शंका मला येईल. तसेच, फेबुवर माणसाची भाषा आणि कल तपासणे अधिक सोपे असते असे मला वाटते.

--------

बारशी, मुलांचे वाढदिवस, ग्रॅज्युएशन पार्टी, देवाची पूजा, लग्न वगैरे समारंभात दारू वाटणारे आपला मोठेपणा दाखवत असतात असे माझे वैयक्तिक मत आहे. अनेक लोकांना स्टेटस सिम्बल आहे असे वाटत असावे.

एका ओळखीच्या व्यक्तिस 'मुलाच्या पहिल्या वाढदिवसाला दारू का बरे वाटली?' असा प्रश्न करता त्याने 'नाहीतर मोठ्यांना वाढदिवसाला येण्यात काय इंटरेष्ट?' असा प्रतिप्रश्न केला.

---------

जसे वयानुसार कपड्यांची, मेक-अपची, छंदांची आवड बदलते (आणि बदलावी असे अनेकांचे म्हणणे पडते) तशी वयानुसार दारूची आवड बदलते का?

----------

आमचे देवही दारू पित असल्याने दारू पिणे यांत काही मोठे नाही. संभाजीमहाराजही पित असावे आणि पहिला बाजीरावही पित असावा. पित नव्हता तो बहुधा औरंगजेब. यावरून दारू न पिणे ही वाईट गोष्ट असावी. - ह. घेणे.

-----------

रिटेप्रमाणेच दारू प्याल्यावर हलके वाटून बंधने मोकळे होण्याचे वगैरे अनुभव नाहीत. डोकेदुखी होते असा मात्र अनुभव आहे. याचा अर्थ मी आणि रिटेने हलके वाटण्याइतपत दारू प्याली नसावी असाही होतो.

---------

खुपते तिथे गुप्ते या कार्यक्रमात भरत दाभोळकर आणि सुदेश भोसले यांनी 'आम्ही दारूच्या थेंबाला स्पर्शही केलेला/ करत नाही.' असे जाहीर केल्यावर मला त्यांची प्रशंसा करावीशी वाटली. त्यांचे हे वाक्य त्यांनी इतरांना 'समारंभात दारू घेतल्यानेच डील्स होतात असे नाही.' याची जाणीव करून देण्यासाठी वापरले होते. तसेच, आपली प्रशंसा व्हावी म्हणूनही ही जाहीरात असावी.

--------

"समाजव्यवहारात वंगण" या प्रमाणात दारूचे सेवन करता तोल सुटत नाही.

दारूच्या एका घुटक्यासरशी तोल ढळलेल्या व्यक्ती पाहिल्या आहेत परंतु वर रिटे म्हणतो तसा हा प्लॅसिबो इफेक्ट असावा किंवा दारूचा आडोसा घेऊन इच्छापूर्तीचा प्रयत्न असावा.

-------

अजून बरेच विचार डोक्यात आले होते. वेळ मिळाला तर टाकेन. ;-)

तूर्तास, चीअर्स!!!! ;-)

--------

* कोणाला यांची नावे हवी असल्यास निरोपातून पाठवता येतील. ;-)

सांस्कृतिक असावे.

वर चित्रा यांनी अमेरिकन राष्ट्र्पतीविषयी उदाहरण दिल्याप्रमाणे "सोबत बसून बियर पिणारा हा अति-शिष्ट नसून आपणा सामान्य लोकांपैकी आहे" हे ध्वनित होते.

उच्च स्टेटस दाखवणे आणि सामान्य स्टेटस दाखवणे या दोन्हींना "स्टेटस सिंबॉल" म्हटले, तर कदाचित हे संस्कृतीनुसार बदलणारे स्टेटस सिंबॉल आहे.

येथे अनेक लोकांनी स्टेटस सिंबॉल आहे, असे मत सांगितले आहे. आपण एक वाटाघाटी करूया. बरेच लोक माझे फोटो बघून "हा स्टेटसची प्रौढी मिरवतो" असा अर्थ घेतील, हे मी लक्षात ठेवतो. आणि जर व्यक्तीच्या प्राथमिक हेतूबद्दल जाण असण्यात अन्य लोकांना जर काही रस असेल, तर "अशा फोटोंमध्ये स्टेटस सिंबल म्हणून मिरवण्याचा प्राथमिक हेतू नसलेले काही लोक असतात." असा बोध घ्यावा.

ज्या लोकांना या विषयाबाबत खरोखर कुतूहल आहे, त्यांनी माझ्या मताला विशेष वजन द्यावे, असे सुचवतो. "आपले असे फोटो उपलब्ध आहेत, आणि आपला आंतरीक हेतू अमुक आहे", असे सांगणारा या चर्चेतला मी एकटाच आहे. आणि चर्चा फोटो लावणार्‍या लोकांच्या आंतरिक हेतूंबाबत असल्यास तो हेतू जोखण्यासाठी बाकीची मते थेट नाहीत. जोवर "आपला आंतरिक हेतू प्रौढी मिरवण्याचा आहे" असे सांगणारे लोक येथे उत्तरे देऊन मला अल्पसंख्येत पाडत नाहीत, तोवर माझ्या मताला नको इतके वजन येते - पण काय करावे?

"आंतरिक हेतूंबद्दल अन्य लोक बहुतेक 'प्रौढी' म्हणून योग्य-समज-किंवा-गैरसमज करून घेतात" हे ५०-६०% फोटो-लावतो-असे-न-सांगणार्‍या लोकांचे आंतरिक इन्टरप्रेटेशन असते, हे मात्र बाकी सर्वांच्या मतप्रदर्शनातून थेट जोखता येते. ही दुसरी माहिती सुद्धा अतिशय उपयोगी आहेच .

- - -
चर्चाप्रस्तावकाला दोन्ही बाजू अपेक्षित असाव्यात असे वाटते. त्या विचारतात :

(दारू पिऊन फोटो जाहीर) करावेसे लोकांना का वाटते? त्यातून त्यांना काय मिळते? काय दाखवून द्यायचे असते?

येथे फोटो लावणार्‍याच्या आंतरिक हेतूचा वेध आहे. हा प्रश्न चर्चाप्रस्तावक त्यांच्या त्या दोन नातेवाइकांना विचारू शकल्या असत्या. पण एक तर त्या विचारू शकल्या नाहीत, किंवा त्यांना उत्तर मिळालेले नाही, किंवा त्यांनी ते येथे दिलेले नाही. त्या नातेवाइकांच्या उत्तराच्या अभावात माझे एकुलते एक मत "फोटो लावणार्‍याचा आंतरिक हेतू" म्हणून येथे उपलब्ध आहे.

दारु पिणे हे स्टेटस सिम्बॉल का मानले जाते?
तुम्हाला अशाप्रकारे दारु पिताना आपले फोटो जाहीर करणे आवडते/पटते का? आवडत/पटत असल्यास का आवडते/पटते आणि आवडत/पटत नसल्यास का आवडत/पटत नाही?

येथे फोटो बघणार्‍या व्यक्तीवर पडणार्‍या आंतरिक ठशाचा वेध आहे. येथे अनेक लोकांची मते उपलब्ध आहेत. हे चांगलेच आहे.

मलाही कारण सांस्कृतिक वाटते म्हणुन मी विषयात संस्कृती असं लिहिल आहे. बुशप्रमाणे मनमोहनसिंग आपला फोटो सामान्य जनतेसोबत दारू पिताना काढणार नाहीत अस वाटत्.

मी नातेवाइकांना विचारू शकत नाही कारण ते अगदी जवळचे नातेवाइक नाहीत.नात्यात त्रास नको त्यांना आणि मला म्हणुन विचारल नाही त्यापेक्षा परक्यांना विचारावे आणि उपक्रमावर अशा चर्चा करता येतात म्हणुन इथे चर्चा टाकली.

@आजुनकोणमी - फक्त समारंभातच असे फोटो काढलेले मी पाहिलेले नाहीत. नवर्‍याने घरात बायकोचा आणि बायकोने घरात नवर्‍याचा, एका मित्राने दुसर्‍याचा फोटोही काढलेला पाहिला आहे. फोटो काढताना प्रसंग आनंदाचा असावा हे बरोबर आहे.

पेप्सी किंवा जेवण हे अंमली नाही, दारु अंमली आहे तेव्हा तिच्यासोबत फोटो काढण्यात मोठेपणा कसला हा प्रश्न आहे.

खालील बहुतांशी प्रतिसाद हा केवळ भारतीयांच्यापुरता मर्यादीत आहे कारण प्रत्येक देशाचे म्हणून एक कल्चर असते त्यामुळे उत्तर थोडेफार बदलू शकेल...

दारु प्याली किंवा नाही प्याली हा चर्चेचा विषय नाही पण त्याची जाहीरात कराविशी लोकांना का वाटते? त्यातून त्यांना काय मिळते? काय दाखवून द्यायचे असते?

मला वाटते, गेल्या पिढीपर्यंत ज्या एका गोष्टीस प्रत्यक्ष-अप्रत्यक्ष बंधने होती अशा गोष्टी आता, "काटोंसे खिच के ये आचल, तोड के बंधन बांधे पायल" अशा पद्धतीने एकीकडे मोकळेपणा आला आहे. परीणामी स्वतःच्या "आज फिर जिने की तमन्ना है" हे कुठेतरी टिपले जाते आणि कुठेतरी दाखवावेसे वाटते. एकदा का ही सामाजीक भूक भागली की ते देखील थांबेल, अजून एक-दोन पिढ्यांमधे आणि नवीन काहीतरी येईल...यात ते चांगले-वाईटचा संबंध नाही, केवळ माझे विश्लेषण इतकेच..

दारु पिणे हे स्टेटस सिम्बॉल का मानले जाते?

कुठल्या कंपूत आहात त्यावर स्टेटस् सिंबॉल का अजून काही ते ठरू शकते. केवळ अल्कोहोलच्याच बाबतीत नाही तर खाणेपिणेओढणे सगळ्यातच.

या संदर्भात मला आठवते आहे की भारतात मी जेंव्हा जॉब करत होतो तेंव्हा अभियंता म्हणून वरपासून ते तळागाळापर्यंत अनेकांशी संबंध येत होता. माझ्या इथल्या एका अनुभवी सहकार्‍याने मला सांगितले की कामे करून घेण्यास मैत्री लागते. आणि जी मैत्री ही चार वेळा भेटून होत नाही ती एक सिगरेट शेअर करून सहज होते. अर्थात ही देखील एक रुढीच झाली होती. मला सिगरेट न ओढता देखील मित्र करता आले आणि कामे करून घेता आली. अर्थात मी ओढणार्‍यांना कधी शिकवायला गेलो नाही, फक्त "नो थँक्स" इतके पुरायचे... सुरवातीस आजूबाजूच्या ओढणार्‍यांना वेगळा (यडा) वाटलो पण नंतर त्यांना सवय झाली आणि कालांतराने त्यातील काहीजण म्हणू लागले की बरे करत आहेस, आम्हाला आता सोडता येत नाही.... असो. सांगण्याचा मुद्दा एकच यात स्टेटस सिंबॉल पेक्षा आपण करतो कुठेतरी कंपूबाजी असते, विशेष करून अशा गोष्टींमधे ज्यांचा अतिरेक हा हानीकारक असतो, तरी देखील केला जातो आणि म्हणून नकळत इतरांकडून पाठींबा हवा असतो. थोडक्यात ज्यांना स्टेटस सिंबॉल वाटतो त्यांना कुठेतरी कसला तरी न्यून/अहं गंड असतो असे वाटते.

ज्या व्यक्ती मद्यधुंद पार्ट्यांचे फोटो लावतात त्यांच्या हातून असे सहजच होत असते असे तुम्हाला वाटते का?

प्रत्येक वेळेस कोणी मुद्दामून शो ऑफ करत नसावेत पण अनेकदा शो ऑफ असतो हे देखील वास्तव आहे. जाहीर संकेतस्थळांवर फोटो जर स्वतः लावले तर कदाचीत शो ऑफ असेलही. पण जर दुसर्‍या कोणी काढलेल्या फोटोत आपण दिसलो तर गोष्ट वेगळी आहे... तात्पर्य, केवळ एका फोटोवरून एखाद्या व्यक्तीचे विश्लेषण करणार नाही...

तुम्हाला अशाप्रकारे दारु पिताना आपले फोटो जाहीर करणे आवडते/पटते का? आवडत/पटत असल्यास का आवडते/पटते आणि आवडत/पटत नसल्यास का आवडत/पटत नाही?

माझे फोटो ठेवत नाही आणि इतरांचे बघायला मुद्दामून जात नाही... बघितले तरी जो पर्यंत सवंगपणा आढळत नाही तो पर्यंत काही विशेष वाटत नाही. :-)