त्याचा परिणाम गुन्हेगारी कमी होण्यांत नक्किच होईल.

पण येथे पोलिसांच्या अपु-या संख्येचाही विचार करावा लागेल (त्याच वेळी आपल्या लोकसंख्येचाही). कदाचित तोच अमेरिकन पोलिस आणि भारतीय पोलिसांमधील मुख्य फरक असेल.

गुन्हे अन्वेषणाला मोठी मदत होण्याची शक्यता आहे
हे पटले.

कोर्डे साहेब,

अलिकडेच मुंबई, ठाणे परिसरातील काही प्रेमी युगुलांवर पोलिसांनी कारवाई केली. त्यापैकी किती जण खून, बलात्कार, घातपात, सायबर क्राइम यांसारखे काही गंभीर स्वरूपाचे गुन्हे करून न सापडलेले किंवा फरारी झालेले गुन्हेगार असल्याचे सिद्ध झाले आहे, याची आकडेवारी दिलीत तर आपल्या म्हणण्यात तथ्य आहे असे म्हणता येईल!

अन्यथा, पोलिसांना काही कामधंदा नसल्याने त्यांनी उगाचच्या उगाच प्रेमी युगुलांना पकडायची मर्दानगी दाखवली असेच म्हणावे लागेल.

मोठमोठे गुन्हे शोधता येत नाहीत, किंवा शोधले तरी राजकीय दबावाखाली काहीही करता येत नाही, म्हणून मग काही धागेदोरे हाती लागतात का हे बघण्याकरता उगाचच्या उगाच प्रेमी युगुलांना पकडायचा फार्स करायचा, हे पोलिसांच्या असमर्थतेचे पोकळ समर्थन आहे असे माझे मत आहे.

अनथा आकडेवारी द्या! तरच आपल्या म्हणण्यात पॉईंट आहे असे म्हणता येईल.

अर्थात, सार्वजनीक ठिकाणी असे काही प्रेमी चाळे करणे हे नक्कीच योग्य नाही आणि म्हणूनच प्रेमी युगुलांना निवांतपणे भेटायला, घटकाभर एकमेकांच्या हातात हात, गळ्यात गळे घालून बसण्याकरता काही प्रेमीपार्कसची नितांत आवश्यकता आहे असे मला वाटते!

अवांतर -

बाकी काही म्हणा कोर्डेसाहेब, एखाद्या छानश्या मुलीसोबत बागेतल्या अंधारात कुचुकुचू करण्यात मजा असते बरं का! ;)

असो!

आपला,
(कोपर्‍या-कोनाड्यातला!) तात्या.

आपल्या लेखाशी मी सहमत. पण त्यासाठी पोलीस दलाने नविन विभाग तयार केल्यास उत्तम. पोलीसांची नजर बरोबर ओळखते कोण गुन्हेगार आणि कोण सज्जन. प्रेमी युगुलांवंर कारवाई झालीच पाहीजे.
आपला
कॉ.विकि

'बिनमहत्वाच्या' कारवाईंत काही महत्त्वाचे धागेदोरे हाती लागण्याची शक्यता आहे.

न्यूयॉर्कमधल्या घटनेत कायदा मोडणारे लोक पकडायचे होते. एक कायदा मोडणारे लोक एकाहून जास्त कायदे मोडत असतील असे होणे तर्कसंगत आहे. प्रेमी युगुले कसले कायदे मोडत नाहीत असे वाटते. त्यामुळे त्यांच्यात असे काही धागेदोरे सापडण्याची शक्यता अगदीच नगण्य.

नव्वदच्या दशकात न्यूयॉर्कमधील गुन्हेगारीचे प्रमाण कमी होण्यामागे अनेक कारणे सांगितली जातात. कार्यक्षम पोलीस, वेगाने वाढणारी अर्थव्यवस्था वगैरे. 'फिक्सिंग ब्रोकन विंडोज' थिअरी किंवा वरील लेखात सांगितलेले विनातिकीट प्रवाशांना पकडण्याचे धोरण यामुळेही गुन्हेगारीला आळा बसला असे सांगण्यात येते.

प्रत्यक्षात 'फ्रीकॉनॉमिक्स' या गाजलेल्या पुस्तकात डॉ. स्टीव्हन लेविट यांनी वेगवेगळा विदा (डेटा) देऊन दाखवून दिले आहे की, याला सत्तरच्या दशकात पारित झालेला गर्भपाताला अनुमती देणारा कायदा मुख्यत्वेकरून कारणीभूत आहे. न्यूयॉर्कमध्ये वाढत्या गुन्हेगारीला कारणीभूत गुन्हेगार हे १६ ते २४ या वयोगटातून, गरीब परिस्थितीतून आलेली मुले होती. गर्भपाताला कायदेशीर मान्यता मिळाल्याने आईलाच नकोशी झालेली, गरिबीतून वर आलेली ही शेकडो मुले जी अखेरीस गुन्हेगारीकडे वळतात, ती जन्माला आलीच नाहीत. १९७३ मध्ये पारित झालेल्या या कायद्याने १६-१८ वर्षांनंतर आपला असा परिणाम दाखवला.

अर्थात, यातून अधोरेखित होणारी गोष्ट एवढीच की केवळ दोन परस्परांना कारणीभूत होऊ शकतील अशा घटना एकाच वेळी घडल्याने त्यांच्यांत कार्यकारणभाव प्रस्थापित होतोच असे नाही. कावळा बसायला आणि फांदी तुटायला गाठ पडते तसे. कदाचित डॉ. लेविट यांनी मांडलेले कारण खरे नसेलही (त्यांनी इतका वेगवेगळा विदा [डेटा] त्याच्या पुष्टीकरणासाठी दिला आहे, की त्यांनी दिलेले कारणच सर्वात सयुक्तिक वाटते), पण ते ही गोष्ट (कार्यकारणभाव प्रस्थापित करण्याची) ठळकपणे दाखवून देते.

त्यामुळे तसेच भारतातही करावे, असे सुचवणे योग्य वाटत नाही. नुकतीच ऐरोली पुलावर एका पंधरा वर्षीय तरूणीवर बलात्कार झाल्याची जी घटना घडली, त्यानंतर असं समजलं की ते प्रेमी युगुल तेथे येण्यापूर्वी जेमतेम दहा मिनिटे आधीच पोलीसांची गाडी तेथे आली होती आणि त्यांनी तेथे आलेल्या प्रेमी युगुलांना हटवण्याचे काम बजावले होते. जर त्यांनी तसे केले नसते, तर कदाचित एकटेपणाचा फायदा घेऊन अपराध्यांना संधी साधता आली नसती.

पोलीसबळाचा वापर यापेक्षा इतर चांगल्या गोष्टींत नक्कीच करता येईल. ठाणे-मुलुंड स्थानकांबाहेर सुरु असलेल्या रॅकेटविषयी नुकतेच वृत्तपत्रांत वाचले. गर्दीच्या वेळेस एखादी महिला कुणाला तरी हेरून त्याला धक्का मारते आणि त्या माणसानेच धक्का मारला असा आरडाओरडा सुरू करते. गर्दी जमते, पोलीस येतात, सावजाला पकडून नेऊन समज देतात आणि त्याचे पाकीट हलके करून तडजोड केल्याचा आव आणतात नि त्याला सोडून देतात. पुन्हा चक्र सुरू. अशी अवस्था असताना, प्रेमी युगुलांवर कारवाई करण्याचा -- तोदेखील एकंदर समाजाच्या सुरक्षिततेला धोका पोहोचू शकतो या सबबीखाली, अधिकार पोलीसांना देणे म्हणजे चोराच्या हाती जमादारखान्याची किल्ली देण्यासारखेच होईल.

या दोन गोष्टींमध्ये कार्यकारणभाव असणे अवघड वाटते. धागेदोरे हवे असतील तर पोलिसांकडे साध्या वेशातील हेर, खबरे अशी बरीचशी साधने असतात. त्यासाठी प्रेमी युगुलांच्या मागे लागण्याचे कारण नाही.