काल आयबीएन् लोकमत वाहिनीवर झालेल्या चर्चेत राष्ट्रवादी पक्षाचे नेते गोविंदराव आदिक यांनी थक्क करणारा पवित्रा घेतला होता.
त्यांचे म्हणणे थोडक्यात असे -
"'आय् पीएल' मध्ये सरकारचा पैसा नाही, सामान्य जनतेचा पैसा नाही.पैसा आहे तो मोठमोठ्या उद्योगपतींचा! त्यांची जर आय् पीएल बाबत काहीच तक्रार नसेल तर तुम्हाला कशाला एवढा त्रास होतोय? त्यांनी कुठे केले आहेत भ्रष्टाचाराचे आरोप? मग कुठे आहे भ्रष्टाचार?"
त्यांच्या या शहामृगी पवित्र्याला हसावे की रडावे ते कळेना...
'उंदराला मांजर साक्ष' ही म्हण गोविंदराव विसरले की काय?

तर भ्रष्टाचार असा झाला आहे -
मोठ्या नेत्यांनी आपले वजन खर्ची घालून आय्पीएल् ला विविध सोयीसवलती आणि करसुविधा मिळवून दिल्या. देशातील प्रचंड काळा पैसा बेनामी फ्रँचायजी (पडद्यामागील) भागीदारांमार्फत खेळात ओतला गेला. (त्यात नफा/तोटा झाला तरी ) काळा पैसा पांढरा झाला. बेनामी काळा पैसा भारतातून मॉरिशसमध्ये जाऊन तेथील बोगस कंपन्यांच्या मार्गे परत भारतात पांढरा बनून आला. (मनी लाँडरिंग). आयपीएल् हे काळा पैसा पांढरा करण्याचे रॅकेट आहे. त्यात मुख्य सूत्रधार कोण हे माहीत नाही. पण ज्याअर्थी या गैरप्रकाराकडे सरकार यंत्रणेने आतापर्यंत दुर्लक्ष केले त्याअर्थी मोठे राजकारणी यात सामिल आहेत असे सकृतदर्शनी वाटते.

दुसरीकडे करोडो प्रेक्षकवर्ग असलेल्या सामन्यांच्या प्रसारणाचे हक्क एका विशिष्ट कंपनीला मिळावेत म्हणून आय्पीएल् च्या पदाधिकार्‍यांकरवी विशेष प्रयत्न झाले. या कंपनीने त्या प्रयत्नांचा मोबदला म्हणून करोडो रुपयांची लाच दिली. या कंपनीला अर्थातच फायदा होणार आणि त्या कंपनीतही एका मोठ्या नेत्याच्या नातलगांची हिस्सेदारी आहे.म्हणजे वाटीतले ताटात आणि ताटातले वाटीत!

तिसरीकडे आयपीएल -२ मध्ये द. अफ्रिकेत बेटिंग-सट्टेबाजी मधून फायदा मिळवता यावा म्हणून मॅच फिक्सिंग केल्याचे आरोप होत आहेत. यातही आय्पीएल् चे प्रमुख सामिल होते असे आरोप आहेत.

हे सारे झाले ते कुणाच्या जिवावर? तुमच्या-आमच्यासारखे करोडो सामान्य प्रेक्षक - जे आवडीचा खेळ पहायचा म्हणून निमूटपणे जाहिरातींचा मारा सहन करतात आणि एका विशिष्ट चॅनलला पहाण्यासाठी पैसे भरतात -त्यांच्या जिवावर. प्रेक्षकांमुळेच तर इतका पैसा जमा होतोय.
मग या घोटाळ्यात सामान्य माणसाचा काही संबंध नाही?
समजा आयपीएलमुळे दहा वर्षात एक हजार कोटी रुपये काळ्याचे पांढरे झाले तर देशाचे नुकसान नाही काय?

पण इतके झाले तरी या प्रकरणाची पाळेमुळे खणून काढली जाणार नाहीत आणि वरवरची मलमपट्टी करून 'ऑपरेशन यशस्वी' झाल्याचे जाहीर केले जाईल असे वाटते.
(ललित मोदी हे घाशीराम कोतवाल आहेत असे आयबीएन-लोकमत म्हणते. मग नाना फडणवीस कोण?)