पंडित सातवळेकर यांनी "मनाचा दृढ विश्वास म्हणजे श्रद्धा" असे एके ठिकाणी म्हंटले आहे. दृढ विश्वास प्रत्यक्ष अनुभवाशिवाय निर्माण होत नाही. यावरून श्रद्धेचे मूळ अनुभवजन्य विश्वासांत असते असे दिसून येते. हीच गोष्ट Dr. F.S. Perls यांच्या Gestalt Therapy या मानसोपचार पद्धतीवरील पुस्तकात सांगितली आहे. त्यात म्हंटल्याप्रमाणे आयुष्यांत वेगवेगळ्या प्रसंगांतून गेल्यामुळे निर्माण झालेला स्वतःच्या सामर्थ्याबद्दलचा अनुभवजन्य विश्वास व त्यामुळे येणारा निश्चिंतपणा, वास्तव स्वीकारण्याची नुसती तयारीच नव्हे तर त्याच्याबद्दल उत्सुकता, वास्तव अपरिवर्तनीय नसून ते प्रयत्नांनी बदलता येते हा अनुभवजन्य आशावाद व कोणत्याही परिस्थितीत आपण टिकून राहतो, मोडून किंवा कोसळून पडत नाही हा अनुभवजन्य विश्वास ही श्रद्धेची अंगे होत. अशी श्रद्धा असलेला मनुष्य भौतिक पातळीवर कुठल्याही प्रसंगाचे स्वागत करतो, त्यातून जातांना त्याला प्रत्येक पावलागणिक आपल्यात आवश्यक ते सामर्थ्य असल्याची जाणीव व्हायला लागते, निरनिराळे पर्याय व मार्ग दिसू लागतात आणि यशप्राप्तीच्या वेळी सर्व काही आश्चर्यकारकरीत्या जुळून येत असल्याचा अनुभव येतो (ज्यात आपल्याला चमत्काराचा भास होतो).