अहो आश्चर्यम्‌
"सुकन्या विद्यालय " ही मराठी प्रशाला.येथे वर्गपटावरील नांवे वर्णानुक्रमे आहेत. नववीतील चकिता लिमये,आश्वर्या लेले, आणि विस्मया लोंढे यांचे पटक्रमांक लागोपाठच्या तीन संख्या आहेत.
आश्चर्या तोंडी बेरजा करण्यात पटाईत आहे.दोन संख्या कानीं पडल्या ,की मनोमनी त्यांची बेरीज करणे, हा तिचा छंद.एकदा या वर्गात बाई हजेरी घेत होत्या...(अवांतर: आमच्या कॉलेजमधल्या एक बाई " नाऊ,बॉईज अयॅण्ड गर्ल्स, गिव्ह युवर प्रेझेंटी"असे म्हणून हजेरी घेत असत!!..हजर= प्रेझेंट म्ह.हजेरी= प्रेझेंटी असे लॉजिक आहे.) तर बाई पटक्रमांक पुकारू लागल्या, तशी आश्चर्या मनात बेरीज करू लागली...१ अधिक २ तीन, अधिक ३ सहा, अधिक ४ दहा....अशी चकिताच्या क्रमांकापर्यंत बेरीज करून तिने ती वहीत मांडून ठेवली. तिचा क्रमांक पुकारल्यावर ’उपस्थित बाई ’ असे म्हणून ती पुढच्या म्हणजे विस्मयाच्या क्रमांका पासून पुन्हा नव्याने बेरीज करू लागली, ती थेट शेवटच्या क्रमांका पर्यंत..ही बेरीज सुद्धा तिने वहीत लिहिली.आश्चर्य म्हणजे ही बेरीज अगोदरच्या बेरजे एवढीच आली.
म्हणजे स्तिमिता आपटे (क्र.१)पासून चकिता लिमयेच्या क्रमांका पर्यंतची बेरीज आणि विस्मया लोंढे पासून अचंबिता क्ष्रीरसागर (शेवटची) पर्यंतच्या क्रमांकांची बेरीज या दोन्ही समान आहेत. पटसंख्या ३० पेक्षा अधिक पण साठ पेक्षा कमी आहे. तर एकूण विद्यार्थिनी किती? आश्चर्याचा क्रमांक किती? (समजा वर्गात आठच विद्यार्थिनी. आश्चर्याचा क्रमांक सहा,तर(१+२+३+४+५)=१५, तसेच (७+८)=१५. पण संख्या >३०).