सुमोचा मागोवा

ऑटो एक्स्पो २००८ मध्ये टाटा मोटर्स कंपनीने १ लाखाची नॅनो सर्वांना दाखवली आणि वाहन जगतात एक क्रांती घडवून आणली. नॅनो दाखवत असतानाच टाटांनी आणखीन एक गाडी सर्वांना दाखवली. नावाने जुनी पण पुर्ण पणे नवी - टाटा सुमो - ग्रँडे.

सुमो ग्रँडे - समोरुन

टाटा सुमो - ग्रँडे आहे कशी? हे पाहण्या आधी आपण सुमोचा थोडा इतिहास पाहू. टाटा सुमो गाडी, वाहनांच्या ज्या प्रकारात ओळखली जाते त्या प्रकाराला बहुपयोगी वाहन (Multi Utility Vehicle) असे म्हणतात. या वाहन प्रकारात तो वर सर्वांना माहीत होती ती गाडी म्हणजे महिंद्राची जीप. अर्थात विली-जीप कंपनीच्या या गाड्या प्रथम महिंद्राने बांधून भारतात विकल्या आणि त्यानंतर या वाहन प्रकारात भारतभर जीप म्हणूनच ओळखले जाऊ लागले. कमीत कमी ५-७ लोकांना घेऊन कोणत्याही रस्त्यावर धावणारे वाहन असे या प्रकारातल्या वाहनांना ओळखले जाते. महिंद्राच्या जीपने बराच काळ भारतीय रस्त्यांवर अधिराज्य गाजवले. त्या नंतर आगमन झाले ते टेम्पो ट्रॅक्सचे. आकाराने थोडी मोठी आणि डॅम्लर क्रायस्लरचे ओएम ६१६ चे शक्तिशाली इंजिन असलेली हि गाडी लोकांना फारच भावली. अर्थात भावली ती गावाकडे अनेक माणसांची वाहतूक करण्याच्या धंद्यासाठी. पण या गाडीने बहुपयोगी वाहन प्रकारातले महिंद्राचे स्थान थोडे कमकुवत केले.

सुमो ग्रँडे

या गाड्यांमध्ये एक कमी होती. ती म्हणजे या गाड्या बंदिस्त नव्हत्या. अर्थात त्यामुळे थोड्या स्वस्त सुद्धा होत्या. पण दीर्घ पल्ल्याच्या प्रवासात सुरक्षिततेचे एक मोठे प्रश्न चिन्ह होते. पावसाळ्यात सुद्धा या गाड्या अनेकदा निरुपयोगी ठरायच्या. तसेच या गाड्या कुलूप लावून बंदिस्त करता येत नसल्याने सामान सुरक्षित राहण्याची मोठी गैरसोय होत होती.

याच दरम्यान मोठे आणि छोटे ट्रक बनवणार्‍या टाटा मोटर्सने (त्यावेळची टेल्को) टाटा इस्टेट हे वाहन बाजारात आणून या प्रकारच्या वाहन क्षेत्रात येण्याचा आपला इरादा स्पष्ट केला होताच. मग बाजारातल्या जीप आणि ट्रॅक्स या वाहनांच्या कमतरतेचा अभ्यास करून टाटांनी सुमो तयार करून बाजारात आणली. पहिली बंदिस्त, बसायला आरामदायक, वातानुकूलित असणारी आणि शक्तिशाली टाटा सुमो १९९४ साली बाजारात विकली जाऊ लागली. लोकांच्या गरजेचा योग्य विचार करून वाहन बनवल्याने सुमोला बरीच मागणी येऊ लागली. सुमोचा खप एवढा झाला की वाहन व्यवसायात जबरदस्त मंदी असताना सुद्धा टाटा मोटर्सची रोजी रोटी म्हणजे टाटा सुमो होती. याच गाडीने कंपनीला मंदीमध्ये देखील तरले होते. त्यानंतर अनेक वर्षांनी मग टोयोटाचे आगमन होऊन क्वालीस आली आणि त्यांनी या गाड्या जास्त आरामदायी अशा असाव्यात याचा पायंडा पाडला. मग महिंद्राची स्कॉर्पिओ (बोलेरो देखील बाजारात आहेच), टवेरा या गाड्यांनी गर्दी केली आणि सुमो या शर्यतीत मागे पडू लागली.

वाहन चालक संबंधीत अंतर्गत रचना २.२ लि. डायकॉर इंजिन

मग २००४ साली सुमोने पहिल्यांदा कात टाकली आणि सुमो व्हिक्टा हे नवे रूप धारण केले. दिसायला तशी जुनीच होती पण अंतर्गत रचना जास्त चांगली होती. पूर्णतः नवे सुकाणू, सुधारीत वातानुकूलित यंत्रणा आणि बसण्यासाठीचे अनेक पर्याय अशा प्रकारची हि सुमो व्हिक्टा आपले वर्चस्व ठेवायचा प्रयत्न करत होती. पण जुन्या आकारात नवे बदल लोकांना फारसे भावले नाहीत. तसेच या वाहनाचे जीवनमान सुद्धा बरेच झाले होते. आता वेळ होती कात टाकण्याची. ऑटो एक्स्पो २००८ ची संधी साधून आता टाटांनी सुमोचे पूर्णतः नवे रूप भारतीयां समोर सादर केले. यावेळी नाव जुने-नवे आहे. सुमो ग्रँडे. पण गाडी पुर्ण पणे नवी आहे. संपूर्ण नवे रूप, नवीन अंतर्गत रचना, शक्तिशाली २.२ लीटरचे डायकॉर (DICOR - Direct Injection Common Rail ) इंजिन अशा वैशिष्ट्यांसह नवी सुमो बाजारात यायला तयार आहे. या गाडीची किंमत ६.५ ते ७.५ लाखांच्या दरम्यान असणार आहे. ऑटो एक्स्पो २००८ प्रदर्शनात प्रत्यक्ष पाहणार्‍या अनेकांना हि गाडी खूपच आवडली असे ऐकण्यात आहे.

शानदार नवी सुमो ग्रँडे पार्श्व बाजुने सुमो ग्रँडे
बैठक व्यवस्था

नॅनो प्रकल्पाचा गिरीश वाघ आणि टाटा सुमोच्या नावातच सामावलेले सुमंत मुळगावकर ही दोन मराठी व्यक्तिमत्त्वे टाटा मोटर्सच्या इतिहासात मोलाचे स्थान पटकावून आहेत याचा आम्हाला सार्थ अभिमान आहे.

चित्रे मोठी दिसण्यासाठी कृपया चित्रांवर टिचकी मारा.





Comments

ही सुमो व्हय!

अदुगर वाटल त्ये जाडे जाडे पैलवान कुस्ती खेळतात ती सुमो.
(हगाम्यात पल्डो तरी बी रेवड्या भेटनारा) हगामा= मातीतील कुस्तीचा आखाडा [स्थानिक शब्द] रेवडी= तिळगुळाची पेढ्याचा आकाराची [परंतु गुळाच्या ढेपेसारख्या] वडी
प्रकाश घाटपांडे

वा! सुंदर!

===========================
मराठी भाषा हा माझा प्राणवायु आहे.
===========================
चाणक्य ह्यांचा मोटार गाड्यांचा अभ्यास एकूणच सखोल दिसतोय. त्यामुळे अतिशय नेमक्या शब्दात त्यांनी नवीन सुमो कशी बनली ह्याबद्दलची कारणमीमांसा केली आहे. त्यासोबत नव्या सुमोचे इंजिन आणि नव्या गाडीचे प्रत्यक्ष स्वरूप छायाचित्रांद्वारे दाखवून लेख अजून माहितीपूर्ण केला आहे.

धन्यवाद

प्रोत्साहनात्मक प्रतिसादा बद्दल धन्यवाद.





वा! सुंदर! +१

चाणक्य ह्यांचा मोटार गाड्यांचा अभ्यास एकूणच सखोल दिसतोय. त्यामुळे अतिशय नेमक्या शब्दात त्यांनी नवीन सुमो कशी बनली ह्याबद्दलची कारणमीमांसा केली आहे. त्यासोबत नव्या सुमोचे इंजिन आणि नव्या गाडीचे प्रत्यक्ष स्वरूप छायाचित्रांद्वारे दाखवून लेख अजून माहितीपूर्ण केला आहे.

अगदी हेच म्हणावेसे वाटले. आत्तापर्यंत तीन साडेतीन लाख मैल गाडी(ड्या) चालवून झाली आहे(त) पण असे व्यवस्थित लिहीता येणार नाही. माहीतीबद्दल धन्यवाद!

गाड्या

एकुणच आलेले प्रतिसाद वाचुन या विषयावर लेखन लोकांना आवडेल असे वाटु लागले आहे. त्यामुळे सर्व प्रतिसाद लिहिणार्‍यांचे मनापासुन धन्यवाद. हा लेख आणखी चांगल्या मांडणीसह टाकता आला असता. तसा तो मनोगतावर टाकला आहे.
गाड्या वापरणे/चालवणे हि एक प्रकारची नशा असते असे वाटते. भारतीयांचे दुर्दैव असे आहे कि आमच्याकडे इंधन हा एक मोठा प्रश्न आहे.





छान

वा!
छान झाला आहे लेख. चित्रांमुळे मजा आली.
पण मलतातून काही आवडली नाही... स्टियरींगव्हील चे डिझाईन पण आवडले नाही.
इथे गोष्टी "इर्गॉनॉमीक" बनवायला बराच वाव आहे असे वाटले.
इरगॉनॉमीक बनवतांना दरवेळी पैसेच जास्त लागतात असे नाही... त्यामुळे कमी पैशातही हे घडू शकेल असे वाटले.
आपला
गुंडोपंत

सहमत...

इरगॉनॉमीक बनवतांना दरवेळी पैसेच जास्त लागतात असे नाही... त्यामुळे कमी पैशातही हे घडू शकेल असे वाटले.
या बद्दल एकदम सहमत. सुकाणु बद्दल मला वाटते कि सुकाणुच्या आकारात टाटाचा लोगो आणण्याचा प्रयत्न केला आहे. बाकि प्रोत्साहनात्मक प्रतिसादा बद्दल धन्यवाद.





छान

लेख आवडला, टाटा सुमो ने तसे १९९४ ते १९९७ चा काळ गाजवला. नंतर् टोयोटाची क्वालीस् आली.
नवीन रुपात् तर् सुमो आकर्षक दिसतेच पण इंजिन देखील् दमदार आहे.

सुमीत, नावा प्रमाणेच असलेला "चांगला मित्र"

मस्त!

नवी सुमो मस्तच आहे! त्यानिमित्ताने एसयुव्हीजचा आढावा चांगला घेतला आहे. टाटांनी "जगातील सर्वात छोटी सेदान" इंडिगो सीएस नुकतीच लाँच केली आहे. त्याबद्दल अधिक माहिती कुठे मिळू शकली नाही.

इंडिगो सीएस

तुर्तास हे छायाचित्र पहा इंडिगो सी एसचे.

इंडिगो सी एस

अधिक माहितीसाठी येथे भेट द्या.





उत्तम , माहितीपर लिखाण

लेख आवडलाच. माहितीपूर्ण आहे. मुख्य म्हणजे लेखकाच्या अभ्यासाशिवाय त्याचे या विषयावरचे प्रेम दिसते. त्यामुळे नुसता कोरडा , केवळ माहितीपूर्ण असा तो राहिलेला नाही. ...
एकूण एका वर्गातील गाड्यांची माहिती वाचत असताना. केबीबी डॉट् कॉम् व एडमंड्स् डॉट् कॉम् या सारख्या अतिशय माहितीपूर्ण अशा स्थळांची प्रकर्षाने आठवण झाली. भारतात अशा प्रकारची साधने उपलब्ध आहेत काय ?

एक (दुय्यम) तक्रार : काही चित्रे मला दिसत नाहीत. हा माझ्या कनेक्शनचा दोष का काय ते माहित नाही...

.... असेच

म्हणते !

लेख आवडला. खरे तर गाड्या हा काही माझ्या आवडीचा विषय नाही, पण माहिती जास्त टेक्निकल न केल्यामुळे आवडली !

एक (दुय्यम) तक्रार : काही चित्रे मला दिसत नाहीत

मलाही !!

संकेतस्थळ

आधिक माहितीसाठी सुमो ग्रँडेचे संकेतस्थळ पहा.





 
^ वर