लोकहो!!

शनी सध्या आश्लेषा नक्षत्रातून जातो आहे. मुळात अशुभ असलेले हे नक्षत्र सध्या फारच बिघडले गेले आहे. ज्या कर्कराशीच्या लोकांचा जन्म आश्लेषा नक्षत्रावर झाला आहे, ते काय परिस्थितीतून जात आहेत, याची आम्हाला कल्पना आहे.

या नक्षत्राचे नाव आदिशेष या पृथ्वीचा भार आपल्या डोक्यावर पेलणार्‍या शेषनागावरून पडले आहे. हे नक्षत्र डोक्यावर काही ना काही भार टाकते. नको त्या जबाबदार्‍या अंगावर येऊन पडतात. प्रभूरामचंद्राचा भाऊ लक्ष्मण याच नक्षत्रावर जन्मला होता.

पण हे नक्षत्र नुसता भार टाकत नाही तर त्या पार पाडण्याचे सामर्थ्यही देते. पंडीत नेहरू, इंदिरा गांधी, जयप्रकाश नारायण या व्यक्ती याच नक्षत्रावर जन्मल्या.

नक्षत्रचक्रातील हे नववे नक्षत्र आहे. आकाशात याचा आकार मराठी ९ सारखा दिसतो. या नक्षत्राचे सर्व चारही चरण हे कर्क राशीत येतात. याचा चौथा चरण हा गंडांतर तारा योगात असल्याने त्यावर जन्मणार्‍या व्यक्तिची जननशांत करावी असे धर्मशास्त्र सांगते.

हे नक्षत्र बुधाचे आहे. चंद्राच्या राशीत आहे आणि या नक्षत्राची देवता सर्प आहे. या नक्षत्रात या तिघांचे गुण/अवगुण एकवटले आहेत. बुधामुळे हे अवखळ आहे, चंद्रामुळे विलासी आहे आणि सर्पामुळे सुस्त पण जागरूक आहे.

या नक्षत्रावर जन्मणारे लोक मध्यम उंचीचे पण जरा जास्त आडवे आणि बेढब असतात. शरीर पुष्ट व मांसल असते. मान, मांड्या, पोटर्‍या, दंड, मनगटे साधारण भरलेली असतात. यांची खूण म्हणजे यांचे नाक. नाकाचा शेंडा हा थोडासा पोपटाच्या चोचीसारखा खाली वाकलेला असतो.

या लोकांचा स्वभाव सुस्त, भिडस्त, ऐषारामी, चंचल, भावनाप्रधान, विकारवश व मोहाला लवकर बळी पडणारा असतो. यांना स्वत:चे ठाम मत नसते. लोकानुकरण करणारे असतात. त्यामुळे त्यांची मते ही त्यांना भेटणार्‍या लोकानुसार बदलतात. लगेच प्रभावित होतात.

स्त्रियांनाही हे नक्षत्र फारसे अनुकूल नाही. या नक्षत्रावर जन्मलेल्या स्त्रिया आडव्या, बेढब बांध्याच्या असतात. त्यांचे अवयव पुष्ट असले तरी आकारहीन असतात. त्यांच्यात चापल्याचा अभाव असतो. मध्यम वयातच अंगाने सुटायला लागतात. गुरू लग्नात असेल तर पोट थुलथुलीत असून कमरेला वळ्या पडतात. त्यांना घराची आणि कुटुंबाची ओढ असली तरी घरकामात विशेष रस नसतो. त्यापेक्षा घरात बसून आराम करणे त्यांना आवडते. नाटक, सिनेमा, दूरदर्शनवरील मालिका, संगीत यांची फार आवड असते. तशा त्या कलाप्रिय असतात. पण स्वत: कला शिकण्यापेक्षा त्याचा आस्वाद घेणे पसंत करतात.

फॅशनची आवड असली तरी आळशीपणामुळे त्यांना फॅशनेबल राहणे जमत नाही. स्वभावाने मात्र प्रेमळ, उदार, हळव्या, दयाळू , भावनाप्रधान असतात.

या नक्षत्रात दोन टोकाची माणसे जन्मतात. एक सतत जाकरूक राहून प्रचंड कार्य करणारे कर्तृत्ववान लोक जे फणा उगारलेल्या नागासारखे तल्लख असतात, तर दुसरे म्हणजे वेटोळे घालून झोपलेल्या सुस्त अजगरासारखे कायम निद्रिस्त.

या नक्षत्रात रवि, मंगळ राहू सारखे ग्रह असतील त्यांच्याकडे जबाबदार्‍या येतातच. अशा वेळेस हे लोक त्यांच्या कुटुंबात प्रमुख असतात. तसेच एखाद्या सोसायटीचा, ग्रामपंचायतीचा, जिल्हापरिषदेचा, साखर कारखान्याचा कारभार सांभाळणारे असतात. पण चंद्र, गुरू, शुक्र या सारखे शुभ ग्रह असतील तर केवळ ऐशाराम हेच त्यांचे ध्येय असते. दुसर्‍यांकडून सेवा करून घेणे हा त्यांचा जन्मसिध्द अधिकार आहे अशा थाटात वावरत असतात. आणि सर्वात कहर म्हणजे या व्यक्ति इतरांशी कशाही कठोरपणे वागल्या तरी इतर लोक त्यांची सेवा करण्यास तत्पर असतात.

या नक्षत्रात रवी असता तो अधिकारयोगाच्या दृष्टीने चांगला असतो. या लोकांची रोगप्रतिकारक शक्ती चांगली असते. पण रवि बिघडल्यास दुसर्‍यावर हुकूमत गाजवून अधिकाराचा दुरूपयोग करण्याकडे कल असतो.

चंद्र असता शरीर मांसल, गुबगुबीत पण रोगप्रतिकारक शक्ती कमी. अधिकाराच्या दृष्टीने चंद्र काही कामाचा नाही. वातविकाराने त्रस्त होतात. मध्यमवयात शरीर सुटते.

मंगळ या नक्षत्रात असता रोगप्रतिकारक शक्ती कमी. अंगात रक्त कमी. ऍनेमिया असतो. स्वभावाने भांडखोर, दुष्ट, खर्चिक, उधळ्या असतात. फाजील पराक्रम करून स्वत:चेच नुकसान करून घेतात.

बुध असता अशक्त, थापाड्या, नकला करणार्‍या असतात. इतरांच्या मागे त्यांची टवाळी करणे यांना विशेष आवडते. एखादा कसा बोलतो, कसा चालतो हे हावभाव करून लोकांना सांगतात.

गुरू या नक्षत्रात बरा असतो. पण अधिकार देणार नाही. शरीर भारदस्त देतो पण त्यांना स्वार्थी, घमेंडखोर बनवतो. वृथा अहंकार निर्माण करतो. मी म्हणजे काय? असे ऍटिट्यूड असते.

शुक्र असता शरीरप्रकृती आणि सौंदर्याच्या दृष्टीने चांगला असतो. चेहरा सुंदर मोहक असतो. पण शरीर बेढब. ज्या स्त्रियांच्या कुंडलीत शुक्र या नक्षत्रात असतो त्या अत्यंत विलासी, चैनी, रंगेल, भोगी आणि विषयासक्त असतात. शुक्र बिघडलेला असल्यास मोहात फार लवकर गुरफटतात.

शनि जर या नक्षत्रात बिघडला तर जुनाट रोगाने पिडीत असतात. या लोकांना काहीतरी व्यंग असण्याची दाट शक्यता असते. हे लोक कपटी, घातकी आणि आतल्या गाठीचे असतात. यांचे आयुष्य इतरांबद्दल कटकारस्थाने करण्यात जाते. स्वत: अतृप्त असतात. कोणी सुखी झाले की त्याच्यावर जळफळतात.

राहू अधिकार आणि कर्तृत्वाच्या दृष्टीने चांगला. हे नक्षत्र क्रूर आणि राक्षसगणी असल्यामुळे राहूला ते मानवते. पण बिघडलेला राहू हा समाजविघातक धंदे करणारा असतो. डान्सबार, दारूचे गुत्ते, मटक्याचे अड्डे यात हे लोक गुंतलेले असतात.

केतू असलेल्याने थंडीपासून खूप त्रास होतो. सतत नाक वहात असते. थोड काही थंड प्यायले की लागले शिंकायला.

हर्षल बुध्दिमत्ता आणि अधिकार देतो पण त्याचबरोबर विक्षिप्तपणाही देतो. बिघडलेल्या शुक्राबरोबर असता वेश्यांच्याकडे जाणारा असतो. तसे नसल्यास रखेली ठेवणारा असतो.

नेपच्यून असता हे लोक रसिक, हौशी असतात. यांना एखादे वाद्य वाजवता येतेच.

या नक्षत्राचे रत्न पाचू आहे आणि २ अंकाचे प्रभुत्व या नक्षत्रावर आहे.

मुहूर्तशास्त्रात हे काही फार चांगले नक्षत्र समजले जात नाही. ते क्रूर, राक्षसगणी आणि गंडांतराच्या योगातले असल्यामुळे शुभकार्याला वर्ज्य आहे. पण ते अधोमुख असल्याने विहीरी खणणे, जमीन नांगरणे, जमीनीचा पाया भरणे, उत्खनन करणे म्हणजे ज्या ज्या गोष्टींना मान खाली ठेवून काम करावे लागते त्यासाठी योग्य आहे. त्याच प्रमाणे द्यूत खेळणे, जुगार खेळणे, दारू गाळणे, जारणमारण, सापाचे विष काढणे असल्या क्रूर कर्मास चांगले समजले जाते. पण शुभकृत्ये या नक्षत्रावर करू नयेत.

आपला,
(सांगोपांग) धोंडोपंत