वर्तमानपत्रातल्या नाटक-सिनेमाच्या जाहिराती आपण पाहतो ते कोणत्या थिएटरमधे कोणता शो किती वाजता आहे हे समजण्यासाठी. पण गेले काही दिवस 'लोकसत्ता'मधली "माय् नेम् इज् खान" ची जाहिरात वेगळ्याच कारणासाठी माझे लक्ष वेधून घेत्ये.

साधारणपणे सिनेमांच्या जाहिरातींत सिनेमाचं नाव व इतर तपशील, त्याचबरोबर कुठल्या थिएटरमधे त्याचे शो किती वाजता आहेत ही माहिती असते. त्यावरून ठराविक ठिकाणी किंवा ठराविक क्षेत्रात रोज किती शो होताहेत याचं ढोबळ गणित मांडता येतं. सर्वसाधारण सिनेमाच्या बाबतीत ही संख्या ५० ते १०० असते असं आढळून येईल.

शिवसेना व शाहरुखखान यांतील वादावादीमुळे "माय् नेम् इज् खान" चं प्रदर्शन १२ फेब्रुवारीपर्यंत लांबणीवर पडलं. त्याची १२ फेब्रुवारीच्या 'लोकसत्ता'मधली जाहिरात पाहिली तर या सिनेमाचे मुंबई, नवी मुंबई, ठाणे, रायगड, या परिसरात रोज सुमारे ७५० शो लावल्याचं दिसतं. १५ फेब्रुवारीच्या जाहिरातीतही रोज जवळपास तेवढेच शो लावले होते असं दिसतं. याच दिवशीच्या ('लोकसत्ता'तल्याच) जाहिरातीत याच परिसरात '३ ईडियट्स्' चे रोज ५० शो लावल्याचं दिसतं. २२ फेब्रुवारीच्या जाहिरातीत "माय् नेम् इज् खान"चे (त्याच परिसरात) रोज सुमारे ५०० शो लावल्याचं दाखवण्यात आलं आहे. एखाद्या सिनेमाचे मुंबई, नवी मुंबई, ठाणे, रायगड, परिसरात रोज इतके शो होणं शक्य आहे का? की शिवसेनेनी थांबवलेला सिनेमा कसा तुफान लोकप्रिय आहे हे दाखवण्याचा प्रयत्न या जाहिरातीतून केला गेला आहे? सिनेमाचे रेटिंग साडेतीन स्टार आहे असं कळतं.

आपल्याला काय वाटतं?