वाचू किती वाचू किती नजर शिणावली।
"या संकेतस्थळावरील लेखनासाठी उपक्रमकर्त्यांनी काही मर्गदर्शक तत्त्वे घालून दिली होती ते तुम्हाला आठवते का?"
"हो.ती आजही लागू आहेतच की! लेख मुख्यत्वेकरून वैचारिक, माहितीपूर्ण असावे याला प्राधान्य आहे"
"यावर प्रारंभी टीका झाली.’रेल्वे समयसारिणीसुद्धा माहितीपूर्ण असते’ असेही काही जणांनी लिहिले.पण संस्थळाची भूमिका अविचल राहिली.सवंगतेला नाकारले.त्यामुळे वैशिष्ट्यपूर्ण ठरलेल्या या संकेतस्थळावर आता उत्तमोत्तम वैचारिक आणि माहितीपूर्ण लेख प्रसिद्ध होत आहेत.त्यांचा स्तर उच्च आहे."
"हो. इथले प्रतिसादलेखनही ज्ञानसमृद्ध ,विचारप्रवर्तक आणि वाचनीय असते.त्यामुळे सदस्य आणि पाहुणे यांची संख्या वाढत आहे."
"अहो, ज्यांना कोणताही विषय अस्पर्श्य नाही, ज्यांचे लेखन अगदी मूलगामी असते, असे श्री. धनंजय, खगोलीय भ्रमणांविषयी आपल्या अधिकार लेखणीने आकलनसुलभ लिहिणारे श्री.आनंद घारे,आपल्या समर्थ लेखणीच्या प्रभावी प्रतिवादाने प्रतिपक्षाला निरुत्तर करून सोडणारे श्री.प्रकाश घाटपांडे,शृंगापत्तीसदृश समस्यांवर सर्वांगीण विचार करून तर्कशुद्ध लेखन करणारे श्री.प्रभाकर नानावटी,पुस्तके,चित्रपट इत्यादींचे चिकित्सक आणि सडेतोड समीक्षण करणारे श्री.सन्जोप राव, यांच्यासारखे ज्ञानसंपन्न सदस्य असल्याने इथले लेखन उच्चस्तरीय असणारच. मला तर वाचू किती असे झाले आहे."
"तसेच कवितांचे मर्मग्राही रसग्रहण या विषयावर शरद यांनी बहार उडवून दिली आहे."
"आणखी प्रियाली, आजानुकर्ण,टग्या ,शास्त्रीयसंगीतावर रसिकतेने लिहिणारे विसोबा खेचर आदि सदस्यांनी; कार्यबाहुल्यामुळे म्हणा अथवा अन्य काही कारणांनी म्हणा; आपल्या लेखण्या सांप्रत टोपणबंद ठेवल्या आहेत. तेही यथावकाश लिहिते होतीलच."
"एकंदरीत आपले उपक्रमस्थळ सद्ध्या आंतरजालावर झळाळते आहे म्हणायचे."
"हो.असेच म्हणतो."