उपक्रम आणि त्याच्या सदस्यांना वर्षपूर्तीच्या अनेक शुभेच्छा!!

या मंचाला अधिक सुदृढ करणे, चोखंदळ बनवणे, त्यावरील सोयी-सुविधा अद्ययावत करणे आणि तशा अनेक अपेक्षा, शंका, सुचवण्या असतील त्या या चर्चेतून मांडल्या जाव्यात.

मी. उपक्रम आपल्या विचारांची नोंद घेणार आहेत का ? एकदा त्यांचे मत येऊ द्यावे असे वाटते.

संकेतस्थळाचे उपक्रम हे नाव समर्पक आहे. इथल्या अड्ड्यावर गप्पा मारायला समाधान मिळते. हे आभासी जग आहे, असे वाटतच नाही. प्रियालींचे (ली वर अनुस्वार दिलाय बरंका )मनोगत अगदी संवादी वाटते. सदस्यांचा विवेकी वावर खरच समाधान करुन देणारा आहे. व्यक्ति तितक्या प्रकृती असणारच पण सहजीवनाची वीण ही घट्ट असल्याने मतमतांतर ही परस्परांना प्रगल्भ करत गेली. अशीच पुढील वाटचाल परस्परांना समृद्ध करो हीच शुभेच्छा.
प्रकाश घाटपांडे

उपक्रम संकेतस्थळाला शुभेच्छा. लवकरच या संकेतस्थळावरील आमच्या वावरालाही वर्ष पूर्ण होईल. वर्षपूर्तीसमारंभ हा मराठी माणसासाठी मोठ्या अभिमानाचा दिवस आहे. ;) (नोट द लँग्वेज!) उपक्रम संकेतस्थळाची पुढील वाटचाल अशीच चालू राहो ह्याच शुभेच्छा.

येणार्‍या नवीन वर्षात काही तांत्रिक सुधारणा, अधिक प्रगल्भ विचार आणि परिपक्व वागणूक इथे दिसेल याची खात्री आहे. ;)

--(उपक्रमी) आजानुकर्ण

उपक्रम संकेतस्थळाला, पडद्यामागच्या सर्व कार्यकारी मंडळींना आणि सर्व सदस्यांना अनेक शुभेच्छा. उपक्रमाची वाटचाल लेखात म्हटल्याप्रमाणे उल्लेखनीय झाली आहे. विज्ञान, तंत्रज्ञान, इतिहास, भाषा अशा अनेक विषयांवरचे उत्कृष्ट लेख इथे वाचायला मिळाले आहेत*. येत्या वर्षात ही वाटचाल अशीच चालू राहो अशी आशा करूयात.

*याचे आणखी विशेष म्हणजे आंतरजालावर विकी सोडल्यास विविध विषयांवरचे मराठीतील लेख उपक्रमावर मोठ्या संख्येने आहेत. गूगल शोधात उपक्रमाचा पेज र्‍यांक वाढवता आला तर अधिकाधिक लोकांना या संकेतस्थळाबद्दल माहिती मिळू शकेल. (हे फक्त एक डोक्यात आले म्हणून. अशा सूचनांसाठी वेगळी चर्चाही करता येईल.)
----
"काय करणार? जुनी खोड. स्वतःलाही सोडलं नाही. नको ते प्रश्न, नको त्या शंका विचारणारच." -- मास्तर, सामना चित्रपटात.

उपक्रमास, उपक्रमपंतांना आणि उपक्रमींना शुभेच्छा !
चिंतनपर लेख आवडला.
--लिखाळ.

या संकेतस्थळाकडून आणि सदस्यांकडून माझ्या अपेक्षा^१ काय आहेत त्या पुढे मांडते:

१. या संकेतस्थळाची सदस्यसंख्या वाढवणे. हे काम (ज्या) सदस्यांना आणि व्यवस्थापनाला करण्याची इच्छा असल्यास करता येईल. मी स्वतः असे प्रयत्न करून पाहिले आहेत. सपशेल अपयश हाती आले.

२. गेल्या काही महिन्यांत उपक्रमाकडून संकेतस्थळाकडे थोडेसे दुर्लक्ष झाल्यासारखे वाटले. याला अनेक गोष्टी कारणीभूत असतील आणि आपण आपल्या कामाची व्यग्रता तपासून पाहता इतरांवर दोषारोप करणे योग्य नाही तरीही मुखपृष्ठ अद्ययावत करणे, थोडेफार^२ सुशोभीकरण करणे, उपक्रमाची इतरत्र प्रसिद्धी करणे हे व्हावे असे वाटते.

३. उपक्रमाचा फाँट बदलून अधिक ठळक फाँट वापरता येईल का?

^१ अपेक्षा पूर्ण व्हायलाच हव्यात असा अट्टहास नाही.
^२ सुशोभीकरण करताना पाने उघडण्यास विलंब लागत असेल तर तेवढे जड सुशोभीकरण न केलेले बरे वाटते.

पहिले प्रथम धन्यवाद, ही चर्चा सुरू केल्याबद्दल. आणि उपक्रमाला धन्यवाद.

गेल्या वर्षभरात इतर संकेतस्थळांपेक्षा वेगळी ओळख (याला माहितीपूर्ण लिखाणासोबत खरडवह्या हेही एक मुख्य कारण :-) ) निर्माण करण्यात उपक्रमास यश आले आहे असे वाटते. उपक्रमाचे उद्देश सुरूवातीस स्पष्ट नसले तरी आता बर्‍यापैकी समजू लागले आहेत (असे वाटते!). आता एक वर्ष होत आल्याने उपक्रमकारांनी त्यांच्या बाजूने काही विचार मांडले तर ते ऐकायला आवडतील. कुठच्याही संकेतस्थळाच्या चालकांनी सतत आपले अधिकार गाजवणे तसेच कधीच काही संवाद न साधणे ही दोन्ही टोके जाणीवपूर्वक टाळली पाहिजेत असे वाटते ( हे बोलायला सोपे आहे, करायला कठीण आहे हे समजते, पण प्रयत्न हाच असला पाहिजे).

मागे मनोगतावर काही तांत्रिक बिघाड झाले होते. तसे होऊ नयेत म्हणून माहिती साठवून ठेवण्याचे जर काही प्रयत्न केले असले तर ते जरूर लिहावेत - इथले आपले लेख तर आपण साठवून ठेवतो, पण त्याला आलेले प्रतिसादही माहितीपूर्ण असतात. तेही टिकले पाहिजेत असे वाटते. याने संकेतस्थळांची विश्वासार्हता टिकेल.

त्याचबरोबर "जरि उद्धरणी व्यय न तिच्या हो साचा हा व्यर्थ भार विद्येचा!" हे ध्येय असल्याने या स्थळाचा प्रत्यक्ष ठोस कामासाठी काही उपयोग झाला पाहिजे अशी उपक्रमकर्त्यांची समजूत होती असे वाटले होते. पण उपक्रमकर्त्यांच्या मनात असेच किंवा काही वेगळे असले तरी ते शेवटी सदस्य कसा विचार करतात ते त्या सदस्यांवर, त्यांच्या व्यक्तीगत पातळीवर होणार्‍या माहिती किंवा विचाराच्या देवाणघेवाणीवर अवलंबून राहील. अशाच देवाणघेवाणीतून जर एखादा खरेच प्रकल्प उभा राहिला असल्यास त्याबद्दल त्या त्या सदस्यांनी लिहावे अशी विनंती. सदस्यांनी प्रत्यक्ष एकत्र देवाणघेवाण किंवा प्रकल्प केले नाहीत तरी दुसरे लोक काय करत आहेत हे कळले तर निदान पुढच्या लोकांच्या अशा इच्छांना चालना मिळेल असे वाटते (बरेचदा लोकांना काही करायचे असते पण काय करायचे ते कळत नसते).

प्रियालीच्या म्हणण्याशी सहमत आहे की सदस्यसंख्या वाढवण्यासाठी प्रयत्न झाले पाहिजेत अन्यथा तेच तेच लोक सतत एकमेकांना प्रतिसाद देत राहिले तर हळूहळू कंटाळा येईल असे वाटते. पण कितीही कामात असले तरी बहुसंख्य सदस्यांना उपक्रम रोज बघावेसे वाटते हे या संकेतस्थळाचे यश आहे असे वाटते. ह्या भावना भविष्यातही अशाच राहोत अशी शुभेच्छा!

उपक्रमाच्या प्रथम वर्षपुर्ती निमित्त माझ्याकडून ही शुभेच्छा! मला वाटणारे बरेचसे मुद्दे वर आले असल्याने परत लिहीत नाही. जरी कधी कधी सभासदांना काही बाबतीत संपादकांकडून धोरणांबाबत अथवा त्यांच्या संपादनाबाबत नाराजी वाटली असली तरी मला येथे लेखनस्वातंत्र्याला (अर्थात त्यांनी ठरवलेल्या घटकांसंदर्भात - म्हणजे ललित, काव्य आदी सोडून) कधी धक्का लावलेला अथवा त्यात चुकीच्या पद्धतीने ढवळाढवळ केल्याचे दिसले नाही. त्याच प्रमाणे त्यांना जे येथे योग्य वाटले नाही त्या संदर्भात निकाल देताना सांगून दिला आहे असे दिसते. हा भाग महत्वाचा वाटतो.

बाकी संकेत स्थळ जसे आहे तसे ठेवले म्हणून काही बिघडणार नाही, पण त्यात नवनवीन सभासदांनी येऊन भर घातली तर आमच्यासारख्यांना पण विविध विषय कळतात, तसेच व्यक्ति तितक्या प्रकृती म्हणजे काय हे संगणकासमोर बसून संवाद करता करता सहज साध्य होते.

हा संवाद वृद्धींगत होत राहोत ही शुभेच्छा!

उपक्रमपंतांना आणि उपक्रमाला माझ्या व्यक्तिगत आणि संपूर्ण मिसळपाव परिवारातर्फे अनेकानेक शुभेच्छा!

-- तात्या अभ्यंकर.

न लगे मुक्ति आणि संपदा, मिसळसंग देई सदा!

===========================
मराठी भाषा हा माझा प्राणवायु आहे.
===========================
उपक्रमाने एक वर्ष (आणि इतर बर्‍याच सभासदांबरोबर मीही एक वर्ष पूर्ण केलेय) पूर्ण केल्या बद्दल उपक्रमपंतांचे आणि ह्या संकेतस्थळावर सातत्याने माहितीपूर्ण लेख/चर्चाप्रस्ताव/कूटप्रश्न लिहिणारे,चर्चा करणारे,चर्चा भरकटवणारे,वादग्रस्त विधाने करणारे, भांडणारे, चिडणारे, चिडून इथून निघून जाण्याची प्रतिज्ञा करणारे आणि त्यांची समजूत पटवून पुन्हा त्यांना इथे येण्यास प्रवृत्त करणारे, निव्वळ वाचनमात्र असणारे आणि क्वचित प्रसंगी आपल्याही मताची पिंक टाकणारे(माझ्यासारखे),एकमेकांच्या खरडवह्या भरणारे आणि त्या वाचण्यात आनंद मानणारे(इथेही माझ्यासारखे) अशा सर्व सभासदांचे मनःपूर्वक अभिनंदन.

ह्या संकेतस्थळामुळे माझा झालेला व्यक्तिगत फायदा म्हणजे "धनंजय" ह्यांच्यासारखे एक बहुआयामी असूनही अत्यंत नम्र असणारे ;तसेच लेख/प्रतिसाद/चर्चा ह्यांद्वारे माहितीपूर्ण आणि संयत लेखन करणारे असे एक व्यक्तिमत्व मला इथे भेटले.

अजूनही काही वैशिष्ठ्यपूर्ण व्यक्तींची त्यांच्या लेखनाद्वारे इथे ओळख झाली. त्यात प्रामुख्याने यनावाला(कूटप्रश्न),प्रकाश घाटपांडे(ज्योतिष), चित्रा(अमेरिकन घरे),विकास(पर्यावरण आणि एकंदरीत जागतिक राजकारण) ह्यांची नावे घेता येतील.

इथे असणार्‍या बहुसंख्य सदस्यांना मी त्यांच्या वैशिष्ठ्यांसह मनोगतापासून ओळखतो म्हणून त्यांचा उल्लेख केलेला नाहीये.
ह्या संस्थळावर मी स्वतः काही लिहू शकत नसलो तरी वाचनानंद मात्र भरपूर अनुभवत असतो.
भावी वाटचालीसाठी उपक्रमाला,उपक्रमपंतांना आणि समस्त सदस्य बंधु-भगिनींना माझ्या मनःपूर्वक सदिच्छा!

पंत, त्यांचा हा उपक्रम आणि 'उपक्रम'च्या सदस्यांना प्रथम वर्षपूर्तीच्या अनेक शुभेच्छा!!

बाळ वर्षाचे झाले!!! "उपक्रम" दिवसाचा अविभाज्य घटक बनला आहे. लहान मुले सगळ्यांनाच आवडतात नाही का? त्यामुळे चालु दे जे चालले आहे ते. अजुन काही वर्षाचा "घोडा झाला" उपक्रम, की मग बघु. आता तरी काही अपेक्षा नाहीत की मागण्या नाहीत. कालानुरुप उपक्रमाची बांधणी करायला उपक्रमपंत व त्यांचे सहकारी समर्थ आहेत.

गेल्या वर्षभरात एकंदर चुका मोजल्या तर सदस्यांनी केलेल्या उपद्रवापुढे उपक्रमवाल्यांच्या चुका खुपच कमी भरतील.

असो एकंदर बरे चालले आहे. उपक्रम हटके आहे हे निश्चित! खुप चांगल्या लोकांच्या ओळखी झाल्या, वेगवेगळ्या विषयावर माहीती व मते मिळतात त्याबद्दल "उपक्रम"च्या पालकांचे, कुटूंबाचे आभार!!

अनेक शुभेच्छा!!

आजपर्यंत तरी, उपक्रमावर सदस्य एकमेकांना सांभाळून घेताना वारंवार दिसत आले आहेत आणि यापुढेही हा समतोल राखला जावा अशी सदिच्छा व्यक्त करावीशी वाटते.

संपुर्णपणे सहमत, मलाही असेच वाटते. राग लोभ रुसवे फुगवे असणारच.
मात्र तेव्हढीच प्रेमळ मंडळीपण इथे आहेत यात शंका नाही.
दोन चार दिवस एखाद सदस्य दिसला नाही तर त्याचे हमखास पणे चौकशी होतेच.

सदस्यांनी हवे तितके भांडावे पण रागावून आत्महत्या मात्र करू नयेत असे मला परत परत सांगावेसे वाटते.मगदीच वाईट वाटले तर काहीकाळ समाधीवस्था घ्यावी... ;)))
म्हणजे राग गेल्यावर परत येण्याचा मार्ग मोकळा... ;)

आपला
गुंडोपंत

मराठी असे आमुची मायबोली तिला बैसवूं वैभवाच्या शिरी |
***********************************
हा लेख तसेच त्यावरील सर्व प्रतिसाद हृद्य आहेत. उण्यापुर्‍या एकवर्षाच्या कालावधीत लेखनातून आपणा सर्व जणात अनुबंध निर्माण झाले आहेत. ते टिकावे.
२/प्रियाली लिहितातः ". या संकेतस्थळाची सदस्यसंख्या वाढवणे. हे काम (ज्या) सदस्यांना आणि व्यवस्थापनाला करण्याची इच्छा असल्यास करता येईल. मी स्वतः असे प्रयत्न करून पाहिले आहेत. सपशेल अपयश हाती आले."
माझा अनुभवही असाच आहे. तरीपण सदस्यसंख्या वाढविण्यासाठी आपण सर्वांनी प्रयत्न करायला हवेत. मला वाटते मराठी टंकलेखन ही एक प्रारंभीची अडचण असावी.
ते उच्चारानुसारी असल्याने सोपे आहे हे पटवायला हवे.

आनंदाचे वर्ष आमच्यापर्यंत पोहचविल्याबद्दल मनापासून धन्यवाद ... भविष्यकाळातील आनंददायी वाटचालीसाठी शुभेच्छा

एकलव्य

अरे वा!.. वर्षपुर्तीबद्दल वाचून आनंद झाला :)
ह्या संकेतस्थळाबद्दल अनेक आभार...
वर्षपूर्तीबद्दल अभिनंदन. आणि पुढिल वाटचालीसाठी अनेकोत्तम शुभेच्छा!

-(उपक्रमी) ऋषिकेश

उपक्रमाची वर्षपूर्ती ही अतिशय आनंदाची आणि समाधानाची गोष्ट आहे. वर्षपूर्तीनिमित्त सर्व सदस्यांना आणि वाचकांना मनःपूर्वक धन्यवाद!

गेले वर्षभर वेगवेगळ्या विषयांवर अभ्यासपूर्ण लेखन, चर्चा आणि विचारांची देवाणघेवाण करून सर्व उपक्रमींनी उपक्रमाच्या वाटचालीत अतिशय मोलाचा हातभार लावला आहे. यापुढेही सर्व उपक्रमींनी आपल्या आवडीच्या, अभ्यासाच्या विषयांवर आणि अनुभवांवर आधारित अधिकाधिक लेखन करीत राहावे अशी पुन्हा एकदा विनंती. उपक्रमींनी प्रयत्नपूर्वक लिहिलेल्या लेखांना इतर उपक्रमींनी नेहमी दाद दिली आहे, अश्या लेखनाला आणि लेखकांना प्रोत्साहित केले आहे, तसेच विविध विषयांवर अतिशय प्रगल्भ आणि माहितीपूर्ण चर्चा उपक्रमावर होत आहेत. याबद्दल सर्व उपक्रमी सदस्य आणि वाचकांचे हार्दिक अभिनंदन!

उपक्रमाच्या वर्षभरातील वाटचालीचा सुंदर आढावा घेणार्‍या या चर्चा प्रस्तावाबद्दल आणि प्रतिसादांतील कौतुकाबद्दल धन्यवाद! उपक्रमाकडून आपल्याला असलेल्या अपेक्षा,उपक्रम अधिकाधिक चांगले बनवण्यासाठीच्या सूचना यांची अतिशय काळजीपूर्वक दखल घेऊ याची खात्री असू द्यावी.

पुन्हा एकदा सर्व सदस्यांचे, वाचकांचे आणि हितचिंतकाचे आभार. उपक्रमाच्या वाटचालीत वेळोवेळी शक्य ती सर्व मदत करणार्‍या सहकार्‍यांचे विशेष आभार.

पुढील वाटचाल अशीच भरभराटीची होवो!

वर्षपूर्तीनिमित्त उपक्रमाचे आणि उपक्रमी सदस्यांचे हार्दिक अभिनंदन! उपक्रमामुळे वेगवेगळ्या विषयांवर मराठीतून चांगले वाचायला मिळते, अनेक माहितगार लोकांकडून सहजासहजी मिळू न शकणारी माहिती मिळते. उपक्रमावर चाललेल्या चर्चा माझ्या विशेष आवडीच्या असल्या तरी लेख लिहिणार्‍या उपक्रमींविषयी मला नेहमी कौतुकमिश्रित आदर वाटतो.
दिसामाजि काही तरी ते लिहावे ... आणि ... अखंडित वाचीत जावे! उपक्रमाला आणि उपक्रमींना अनेकोत्तम शुभेच्छा.

उपक्रम आणि उपक्रमींचे वर्षपूर्तिबद्दल अभिनंदन आणि पुढील वाटचालीसाठी शुभेच्छा.
सोनाली

वर्षपूर्तीच्या निमित्ताने उपक्रमचे आणि उपक्रमींचे हार्दिक अभिनंदन!

स्नेहांकित,
शैलेश