एककूट चांगला प्रतिशब्द वाटतो. संगणक जसा अंगवळणी पडला तसा हा प्रचलीत होण्यास अडचण नसावी. सोपा आहे. पण प्रत्येक तांत्रिक शब्दाला प्रतिशब्द हवाच का? हा मुद्दा मात्र दुर्लक्षिला जाउ शकत नाही.
प्रकाश घाटपांडे

प्रेषक श्रीयुत प्रकाश घाटपांडे यांसी सादर प्रणाम करोन..

प्रत्येक तांत्रिक शब्दाला प्रतिशब्द हवाच, असा अट्टाहास नाही. तरीही, ज्यांना तो हवा आहे, त्यांच्यासाठी एक सोय म्हणून असा शब्द असावयास हवा असे वाटते.

ज्यांच्या अंगवळणी तो पडणारच नाही, ते मूळ आंग्लभाषी शब्दयोजना करू शकतील!

हैयो हैयैयो!

प्रेषक श्रीयुत वाचक्नवी यांसी..

माझ्या वाचनात सकाळ-संध्याकाळ अनेक प्रकारची हिंदी-मराठी शासकीय कागदपत्रे येतात. (बांबे सरकार चे ग्याझेट् वगैरे.) त्यात मी आजपर्यंतच्या माझ्या कारकिर्दीत Code ह्या आंग्लाभाषी शब्दाचे मराठीकरण 'कूट' असेच वाचले आहे.

उदा:

1. STD Code = अस्थानीय दूरभाष कूट;
2. ISD Code = आंतरराष्ट्रीय अस्थानीय दूरभाष कूट;
3. Code Language = कूटभाषा;
4. Pin Code = पीन कूट इत्यादि इत्यादि.

तरीही आपण म्हणता ते खरे असू शकेल. कसे ते आपण सांगावे.

हैयो हैयैयो!

मराठीत कूट म्हणजे चूर्ण किंवा कोडे . त्यामुळे कोड लॅंग्वेज म्हणजे सांकेतिक भाषा--कूटभाषा नाही. बाकीचे आपण लिहिले आहेत ते हिंदी शब्द आहेत, त्यांच्याशी आपल्याला काही देणेघेणे नाही. अस्थानीय असा शब्द मराठीत नाही. स्थानीयपण नाही, स्थानिक असेल. दूरभाष नाही. हिंदीत प्रेक्षकाला दर्शक(म्हणजे दाखवणारा) म्हणतात. मालकीचा वगैरे दावा करणार्‍याला दावेदार म्हणतात. मराठीत म्हणता येईल? मेलेल्या माणसाच्या नावामागे स्वर्गीय लावतात, आपण लावू? आपल्याकडे फक्त अप्सरा आणि त्यांचे सौंदर्य स्वर्गीय असते. किंवा डोंगरावरून दिसणारा एखादा देखावा. मराठी माणूस मेला तरी स्वर्गीय होत नाही. हिंदीत जिवंत पुरुषाच्या नावामागे श्रीमान किंवा माननीय लावतात. मराठीत श्रीयुत आणि श्रीयुतच! परंतु, मराठीत पदनामाच्या मागे मात्र माननीय लावता येते, जसे- माननीय मुख्याध्यापक, संपादक वगैरे; आणि तेही 'मा.'असे संक्षिप्त रूप न करता. 'मा.' हे मराठीत कसलेच अधिकृत संक्षिप्त रूप नाही, असलेच तर ते माजीचे किंवा माजलेल्याचे? आणि एक, पिन्‌ला पीन कधीच म्हणणार नाही, पीन म्हणजे पुष्ट, लठ्ठ. पिन्‌कोडला मराठीत संकेतांक म्हणतात. कुठलाही सरकारी(शासकीय ?)किंवा अन्य शब्दकोश पाहून खात्री करून घ्यावी.--वाचक्‍नवी