आता थोड्याच दिवसांत (२६ जूनला) दहावीचे बोर्डाच्या परीक्षेचे निकाल जाहीर होतील. निकालाच्या निमित्ताने आजकालचे शिक्षण रोजगार मिळण्याच्या दृष्टीने कसे निरुपयोगी आहे हे पुन्हा पुन्हा सांगण्यासाठी प्रसारमाध्यमांतील रकाने च्या रकाने खर्च होतील. जणू काही शिक्षणाचा एकमेव हेतु माणसाला पोट भरता यावे हाच आहे.

खरे तर शालेय शिक्षणाचा हेतु माणसाला जगाची माहिती करून देणे तसेच त्याला नवीन माहिती मिळवण्यासाठी व नवनिर्मितीसाठी सक्षम बनवणे हाच असायला हवा. त्याची रोजगाराशी सांगड घालणे चूक आहे. शिक्षणाने सक्षम झालेला माणूस स्वतःच्या रोजगाराचा प्रश्न स्वतःच सोडवू शकेल. शिक्षणसंस्था या उत्पादनक्षेत्राच्या गरजेप्रमाणे यंत्रमानव पुरवणारे कारखाने होऊ नयेत. तसे झाले तर नवनिर्मिति थांबेल. माणसाच्या गरजा पोट व त्याच्या आसमंतांतला प्रदेश यांच्यापुरत्याच मर्यादित नसतात. जगण्यासाठी त्याला स्वप्नांचीही गरज असते.

विचार करा. फक्त रोजगाराचा विचार डोळ्यासमोर ठेवून शिक्षण देणे कितपत योग्य आहे?