दिवाळी अंकातील "ढीगभर लक्षणे की एकसंध व्याधी" (दिवाळी अंकातील दुवा.) या लेखाबाबत चर्चा या धाग्याखाली करूया.

प्रत्येक प्रश्न/टिप्पणी या धाग्याखाली उपप्रश्न असू शकतील.

एका प्रश्नाचे उत्तर येथे सुरुवातीलाच देतो : "नेमके कोणाचे प्रबोधन अथवा नेमका काय हेतू समोर ठेवून लेख लिहला (टारगेट ऑडीयन्स) याचा खुलासा आल्यावर लेख नीट समजायला मदत होईल."
उत्तर : वैद्यकाबाबत, आणि एकुणातच विज्ञानाबाबत जिज्ञासा असणारे, आणि प्रामाणिक वादविवादांतील विवादकांचे आधार स्वतःहून ढोबळमानाने पडताळू इच्छिणारे असे वाचक या लेखाचे लक्ष्य होत.

आपणापैकी अनेकांना
(१) "ही घ्या प्रश्नांची अंतिम उत्तरे" असे बाबावाक्य नको असते,
(२) "हा विषय सगळ्यांसाठी अनाकलनीय आहे" अशी नि:सार बोळवणही नको असते,
परंतु
(१) संदिग्धतेमध्येही कृतिशील निर्देश हवे असतात,
(२) सारासारविवेकाच्या सदैव चालत असलेल्या प्रक्रियेचे आकलन हवे असते.

अशा वाचकांना या लेखातील विचारधारा उपयोगी पडू शकेल.

अशा वाचकांची जिज्ञासा वैद्यकाबाबत असेल, भूगर्भशास्त्राबाबत असेल, अर्थशास्त्राबाबत असेल... मानवी जीवनाला स्पर्श करणार्‍या कुठल्याही विज्ञानाबाबत असेल. "ढीगभर लक्षणे" लेख त्यापैकी वैद्यकातील कुतूहलास अनुसरून आहे. आपणा सर्वांच्या जिज्ञासेला आव्हान देणारी वैद्यकातील संदिग्धता कुठली? त्यापैकी एक ही जरूर आहे : वर्तमानपत्रात "उपटसुंभ" नवीन रोग अधूनमधून घबराट पसरवतात : एड्स काय, सार्स काय, अमुक काय आणि तमुक काय. यात खरे-खोटे म्हणा, उपयोगी-निरुपयोगी म्हणा, किती घाबरावे-किती स्वस्थ राहावे म्हणा... हे कसे ठरवता येते? त्यावरून आपण सहजच या मूळ प्रश्नापाशी येऊन ठेपतो :
"शरिराच्या लक्षणांच्या वाटेल त्या संचालाच आपण व्याधी म्हणत नाही. पण मग कुठल्या एकत्रित संचाला एकच व्याधी असल्याचे ठरवतो?" याच वाक्यांनी दिवाळी अंकातील लेख सुरू होतो, व पुढे जातो.

लेखात "मेटाबॉलिक सिन्ड्रोम" बाबत अद्ययावत आणि समजावयास सोपी माहिती आहे. पण ती देणे हा लेखाचा उद्देश खचितच नाही. या विषयाबाबत संदिग्धता आहे, आणि संदिग्धता कशी सोडवता येते, त्याबाबत विश्लेषण आहे. असे कृतिशील उदाहरण दिल्याशिवाय आदला तात्त्विक ऊहापोह फक्त "तात्त्विक"च राहिला असता. हे तात्त्विक विश्लेषण प्रत्यक्ष उदाहरणात लागू करून दाखवल्यामुळे वाचक स्वतःला महत्त्व वाटणार्‍या संदिग्ध विषयाबाबत स्वतःहून लागू करण्यास उद्युक्त होतील, अशी आशा आहे. येथे तपशिलांबाबत प्रबोधनाचे उद्दिष्ट्य दुय्यम आहे, आणि विषयाबाबत सबलीकरणाचे उद्दिष्ट्य प्राथमिक आहे.