आपण सर्वच जाणता की तंजावूर शहरावर पूर्वी शिवाजीराज्यांचे सावत्र भाऊ व्यंकोजीराजे राज्य करीत असत. त्यामुळे तंजावूर मध्ये अजूनही मराठी जाणणारे अनेक लोक आहेत असे म्हणतात. माझा एक मित्र त्या भागातील कन्नड भाषिक पण मूळचा मराठी आहे. त्याच्या सांगण्यानुसार तंजावूर मधील मराठी जन मराठीच बोलतात. पण त्या भाषेला आपण महाराष्ट्रातील आजचे मराठी जन मराठी म्हणणार नाही एव्ह्ढी ती भाषा वेगळी आहे. पण ते तंजावूरी मराठी जन त्या भाषेला मराठीच समजतात.
मला त्याचे एक कारण जाणवते ते की व्यंकोजीराजांनंतर अनेक वर्षे त्या लोकांना महाराष्ट्रातील बदललेली मराठी माहितच नाही. कारण ते मूळ मराठीपासून तुटलेल्या एका वेगळ्याच बेटावर वावरल्यासारखे मराठी बोलतात. ते आजही शिवाजीराजांच्या काळातील मराठी बोलत असावेत. त्यांच्या दृष्टीने त्यांची भाषाच शुध्द आहे.
आता सांगा शुध्द व अशुध्द मधील फरक.

नितीन

सावरकरांनी इंग्रजी शब्दांसाठी जे प्रतिशब्द दिले त्यातील बहुतेक सर्व लेखी भाषेत रूढ झाले. उदाहरणार्थ : प्रशाला(सावरकरांचा प्रशाळा), महाविद्यालय(महाशाळा लोकांनी स्वीकारला नाही.!), ज्ञानशाखा, प्रबोधिनी(सावरकरांचा प्रबोधिका!), मुख्याध्यापक, आचार्य, प्राचार्य, प्राध्यापक, प्रपाठक, अध्यासन, विद्यासन, वगैरे. लेक्चररसाठी सावरकरी शब्द,प्रवाचक. हा कधी वापरलेला आठवत नाही. कदाचित शिक्षणक्षेत्रापुरता मर्यादित वापर असावा.
रूढ न झालेले शब्द: विधिज्ञकी(वकिली), परीटगृह(लॉन्ड्री), शिवणकलागृह(टेलरिंग शॉप)उपसंधी(ट्‌रूस), उपयुद्ध(कॅम्पेन),
ग्रंथ टपाल(बुक पोस्ट),उपमुद्रित(प्रुफ़), पटांकित(रजिस्टर्ड), धनटपाल(मनी ऑर्डर), वस्तुटपाल(पार्सल), परिचयपट(ट्रेलर),
कालदर्श/मितिपट(कॅलेन्डर), संयत वात/समशीतोष्ण/सुखशीतोष्ण/शीतल(एअर कन्डिशन्ड) वगैरे. डिस्पेन्सरीसाठी सुचवलेला औषधालय हा फक्त आयुर्वेदिक व होमिओपॅथिक औषधांच्या दुकानासाठी जनमान्य झाला. डॉक्टर जिथे दुकान काढून बसतात त्या खोलीला आणि युनानी औषधे मिळतात त्या दुकानाला अजूनही सावरकरांना मान्य नसलेला दवाखाना हा शब्दच वापरला जातो.

इंग्रजी शब्दांसाठी सावरकरांनी दिलेले आणि लेखी-तोंडी रूढ झालेले शब्द अनेक आहेत. पण त्यांनी काढून टाकायला सांगितलेले अरबी-फारशी शब्द मात्र निघून न जाता तसेच राहिले, आणि या उपर सावरकरांचे संस्कृत शब्दही बोलण्या-लिखाणात येऊ लागले. या बाबतीत सावरकरांना यश मिळाले नाही.
टीप:-सावरकरांनी लिहिलेल्या मराठी भाषेचे शुद्धीकरण(१९२६) या पुस्तिकेच्या शेवटी 'त्याज्य विदेशी शब्दांचे टांचण' ह्या नावाचा एक लघुकोश दिला आहे . त्यात दिलेल्या शब्दांवर आधारित वरील लिखाण आहे.
अवांतर:'बस स्टॉप'साठी 'थांबा' हा शब्द आचार्य अत्र्यांनी सुचवला असे वर आले आहे. पण सावरकरप्रणीत शब्दांत हा शब्दही आहे.-वाचक्‍नवी