याहू! टाटा आणि जलदसंगणन

उपक्रमींना कळवण्यास आनंद होतो की, आम्ही आधी येथे उल्लेखिलेला, टाटांनी निर्माण केलेला, जगातील चौथ्या क्रमांकाचा महासंगणक, याहू!च्या सहकार्याने आता भारतातील ख्यातनाम विद्यादानसंस्थांतील संशोधकांना आणि विद्यार्थ्यांना विनामूल्य वापरासाठी उपलब्ध आहे.

बातमी इथे वाचा.

हे जलदसंगणन (क्लाऊड कॉम्प्युटिंग) म्हणजे काय ?

समजा तुम्हाला एक समस्या सोडवायची आहे. उदाहरणार्थ:

१. माझी जनुके अशी आहेत, मला भविष्यात कोणता रोग होण्याची शक्यता आहे ?
२. माझ्याकडे काही संस्थांचे समभाग आहेत, पुढच्या दहा वर्षांत त्यावर मला किती नफा मिळेल ?
३. माझ्या संस्थेने आपल्या संकेतस्थळाची जाहिरात अनेक स्थळांवर केलेली आहे, ती किती लोकांनी बघितली ?

ह्या सर्व प्रश्नंाची उत्तरे देण्यासाठी तुमच्या घरचा खाजगी संगणक उपयोगाचा नाही. एका संगणकावर हे सगळे करायचे म्हटले तर ह्या प्रत्येक प्रश्नाला किमान दहाहजार तास (अदमासे दीड वर्षे) लागतील. पण तासाभरात उत्तर हवे असेल, तर दहाहजारापेक्षा अधिक संगणक लागतील. तुम्हाला ते परवडणार नाहीत. कारण त्यांची किंमत ४०० कोटी रुपये, एवढी असेल.

पण समजा टाटांनी तुम्हाला एका तासासाठी त्यांचे दहाहजार संगणक ५ रुपये एका संगणकाला, एका तासाला असे उपलब्ध करून दिले तर ? एका तासाच्या वापरासाठी त्यांना फक्त पन्नास हजार रुपये द्यावे लागतील. ४०० कोटी रुपये देऊन माझा स्वत:चा महासंगणक बनवायचा, की तासभर वापरासाठी फक्त ५०००० रुपये द्यायचे हे तुम्ही ठरवा.

मला तरी दुसरा पर्याय आवडेल.

हाच तो संगणनाचा ढग (जलद).

(मीच तयार केलेला "जलदसंगणन" हा शब्द मलाच भावलेला आहे, कारण मूळ "क्लाऊड कॉम्प्युटिंग" मधला "क्लाऊड" आणि, जलद म्हणजे वेगवान हादेखील अर्थ अंतर्भूत आहे. शब्दभांडाराला अशा शब्दांची गरज आहे.)

हे जलदसंगणन यापुढे खुपच महत्वाचे ठरणार आहे, म्हणून टाटा आणि याहू! ह्या दोन बलाढ्य संस्थांनी जलदसंगणन संशोधन केंद्र उभारले आहे. ह्या केंद्रात हडूप ह्या जलदसंगणन आज्ञावलीवर आधारित प्रणाली विकसीत करण्यात येणार आहेत. (बढाई मरण्याची तशीही मला सवय आहेच, पण येथे सांगणे आवश्यक आहे, की हडूप ह्या आज्ञावलीच्या गाभ्याच्या विकसनात मी गेली तीन वर्षे कार्यरत आहे.)

हडूप ही मुक्तस्रोत प्रणाली आहे. मी गेले वर्षभर ह्या प्रणालीविषयी शेकडो लोकांना पारंगत करतो आहे. तुम्हाला अथवा तुमच्या संस्थेला ह्या प्रणालीत रस असेल, तर मला कळवा. ह्या उन्हाळ्यात भारताची फुकट यात्रा करण्यास मी उत्सुक आहे :-) (मी सहा तासांच्या ह्या प्रशिक्षणासाठी -फक्त- एक हजार डॉलर्स घेतो. प्रवास खर्च वेगळा. प्रोजेक्ट कन्सल्टिंग, अर्थात प्रकल्पसल्ल्याचे शुल्क वेगळे, बरे का? )

(उपक्रम आणि इतर स्थळांवरील माझ्या मित्रमैत्रिणींनी मी आजवर कशात एवढा व्यग्र होतो, हे आपुलकीने विचारले आहे. ह्या लेखातून त्यांना ह्या प्रश्नाचे उत्तर मिळेल. आता हे काम मार्गी लागले, की उपक्रम आणि अशाच इतर स्थळांवरील सदस्यंाना पिडण्यासाठी मी मोकळा असेन, तेव्हा ही ऍडव्हान्स वार्निंग समजावी :-)